Sorphirða hefur gengið vel að undanförnu þrátt fyrir aukið magn úrgangs. Jól og áramót eru hefðbundinn álagstími hjá Sorphirðu Reykjavíkur og einnig eru grenndarstöðvar mikið notaðar á þessum árstíma. Það er því gott að hafa í huga til að allt gangi vel fyrir sig að flokka vel allan úrgang og nýta plássið í tunnunum vel. Boðið verður upp á sérstaka gáma fyrir flugeldarusl eftir áramótin á tíu stöðum í borginni.
Þjónusta sorphirðu yfir jól og áramót
Starfsfólk sorphirðunnar verður aukalega að störfum laugardaginn 21. desember en síðasti vinnudagur fyrir jól er 23. desember. Vinna hefst aftur á þriðja í jólum og einnig verður unnið helgina þar á eftir, 28. og 29. desember. Sorphirðan verður að störfum 30. desember og á gamlársdag verður unnið til klukkan 10.30. Sorphirða hefst aftur á nýju ári þann 2. janúar en einnig verður unnið laugardaginn 4. janúar.
Þjónusta á grenndarstöðvum um jólin
Notkun á grenndar- og endurvinnslustöðvum Sorpu eykst jafnan á þessum árstíma. Búið er að skipuleggja aukavaktir í kringum hátíðirnar. Áhersla verður lögð á að tæma gámana fyrir pappír og plast reglulega þar sem þessir flokkar eru líklegastir til að safnast upp í kringum þessa miklu gjafahátíð.
Gámar fyrir pappír og plast eru nú staðsettir á öllum stærri grenndarstöðvum. Minnum líka á að með nýja flokkunarkerfinu hófst söfnun á glerumbúðum og málmum í grenndargámakerfinu. Gáma fyrir þessa flokka má finna á öllum grenndarstöðvum höfuðborgarsvæðisins en kort yfir þær er hægt að skoða á vef Sorpu.
Gámar fyrir flugeldaleifar
Reykjavíkurborg ætlar að bjóða upp á gáma fyrir flugeldarusl á tíu grenndarstöðvum um alla borg. Gámarnir verða settir upp dagana fyrir gamlársdag svo þeir verða klárir til þess að taka á móti flugeldaruslinu á nýársdag. Frá og með 2. janúar verður tekið á móti flugeldaleifum á endurvinnslustöðvum Sorpu á hefðbundnum opnunartíma. Sem fyrr fara ósprungnir flugeldar fara í spilliefnagáma á endurvinnslustöðvum Sorpu.
Staðsetningarnar eru þessar:
- Vesturbær – grenndarstöð við Hofsvallagötu (Vesturbæjarlaug)
- Miðborg - grenndarstöð Eiríksgötu (við Hallgrímskirkju)
- Hlíðar - grenndarstöð við Flókagötu (Kjarvalstaði)
- Laugardalur - grenndarstöð við Sundlaugaveg (Laugardalslaug)
- Háaleiti-Bústaðir - grenndarstöð við Sogaveg
- Breiðholt – grenndarstöð við Austurberg
- Árbær/Selás – grenndarstöð við Selásbraut
- Grafarvogur – grenndarstöð í Spöng
- Grafarholt-Úlfarsárdalur – grenndarstöð Þjóðhildarstíg (við Krónuna)
- Kjalarnes – við grenndarstöð