Velferðarsvið Reykjavíkurborgar í viðbragðsstöðu vegna óveðurs
Ef veðurspá morgundagsins gengur eftir hefur það ýmis áhrif á þjónustu velferðarsviðs. Viðbúið er að akstursleiðir verði illfærar og því má búast við talsverðri seinkun á þjónustu heimahjúkrunar og heimaþjónustu, þar sem erfitt getur reynst að komast í vitjanir, sérstaklega í efri byggðum.
Allur morgunakstur Pant, sem sinnir akstursþjónustu fyrir fatlað fólk og eldri borgara, fellur niður. Því er ljóst að einstaklingar sem nýta þjónustuna komast ekki til sinna starfa í fyrramálið.
Viðbúið er að seinkun verði á matarsendingum frá mötuneyti velferðarsviðs á Vitatorgi. Allir munu þó fá matinn heim og reynt verður eftir bestu getu að takmarka seinkunina.
Dagdvölin Þorrasel og dagdvölin Vitatorgi verða lokaðar. Þá fellur félagsstarf í félagsmiðstöðvum velferðarsviðs niður fyrir hádegi.
Neyðarskýli sem Reykjavíkurborg rekur, Konukot, gistiskýlið á Lindargötu og neyðarskýlið á Granda, verða öll opin. Þetta er í samræmi við neyðaráætlun málaflokks heimilislausra vegna veðurs sem hefur verið virkjuð.
Fólk er hvatt til þess að fylgjast vel með frekari tilkynningum í fyrramálið.