8,1% aukning á þjónustu velferðarsviðs á milli ára
Árið 2021 var viðburðaríkt á velferðarsviði, eins og lesa má úr nýútkominni ársskýrslu sviðsins. Þörfin fyrir velferðarþjónustu jókst, líkt og hún hafði gert árið á undan. Á árinu fengu 18.564 einstaklingar þjónustu frá velferðarsviði og hafa aldrei verið fleiri.
Aukningin náði til langflestra málaflokka sem heyra undir velferðarsvið. Til að mynda fengu 6.388 einstaklingar þjónustu í heimahúsum og 5.515 fengu ráðgjöf eða sérfræðiþjónustu af einhverju tagi. 5.629 einstaklingar fengu húsnæðisstuðning og 3.667 fengu fjárhagsaðstoð, ýmist í formi styrks eða láns.
Fyrsta velferðarstefna Reykjavíkur samþykkt
Ýmis jákvæð skref voru tekin til að bæta þjónustu við íbúa Reykjavíkur á árinu 2021, sem lesa má um í ársskýrslunni. Heimsfaraldur Covid-19 setti vissulega svip sinn á árið líkt og árið á undan en hápunkti var hins vegar náð um sumarið, þegar fyrsta velferðarstefna Reykjavíkurborgar var samþykkt. Í stefnunni er notendasamráð í öndvegi, sem á einnig við um verkefnið Betri borg fyrir börn (BBB), sem samþykkt var á árinu að innleiða í öllum hverfum borgarinnar. Bæði stefnunni og BBB-verkefninu fylgja talsverðar skipulagsbreytingar og voru stöður fjölda stjórnenda auglýstar lausar til umsóknar. Meðal annars var þjónustumiðstöðvum fækkað úr fimm í fjórar en á móti kom til sögunnar rafræn miðstöð, sem er fyrsta snerting notenda við þjónustuna. Þá fengu miðstöðvarnar ný heiti: Norðurmiðstöð, Suðurmiðstöð, Austurmiðstöð og Vesturmiðstöð.
Ársskýrsluna í heild má skoða hér.