Ný hámarkshraðaáætlun Reykjavíkur var samþykkt í vor og er fyrsti áfangi áætlunarinnar að koma til framkvæmda um þessar mundir. Verið er að endurmerkja og skipta út skiltum vegna lækkunar hraða á nokkrum götum í borginni. Merkingarnar taka gildi jafnóðum og þær koma upp.
Markmið hámarkshraðaáætlunarinnar er að stuðla að bættu umferðaröryggi í Reykjavík til að koma í veg fyrir alvarleg slys á fólki í umferðinni. Nauðsynlegt er að draga úr umferðarhraða til að ná því.
Í þessum breytingum er lögð áhersla á götur við leiðir barna til og frá skóla eða frístundum sem og götur þar sem er mikill fjöldi gangandi vegfarenda. Íbúar hafa kallað eftir því að hámarkshraði verði lækkaður í þeirra nærumhverfi. Lækkun hraða bætir öryggi, hljóðvist og stuðlar að betri lífsgæðum fyrir íbúa.
Þessar götur verða með hámarkshraða 40 km/klst
- Snorrabraut, milli Burknagötu og Grettisgötu.
- Fjallkonuvegur, milli Gullinbrúar og Frostafoldar.
- Fjallkonuvegur, milli Jöklafoldar og Hallsvegar.
Þessar götur verða með hámarkshraða 30 km/klst
- Snorrabraut, milli Grettisgötu og Sæbrautar.
- Borgartún, milli Snorrabrautar og Katrínartúns.
- Nóatún, milli Laugavegs og Borgartúns.
- Engjateigur.
- Langholtsvegur, milli Skeiðarvogs og Sæbrautar.
- Álfheimar.
- Holtavegur, milli Langholtsvegs og Sæbrautar.
- Stjörnugróf.
- Seljaskógar, milli Grófarsels og Hjallasels.
- Bæjarbraut.
- Rofabær, milli Hraunbæjar og þrengingar austan Brúaráss.
- Bjallavað.
- Ferjuvað.
- Völundarhús, milli Suðurhúsa og Gagnvegs til vesturs.
- Langirimi, milli Hallsvegar og Flétturima.
- Mosavegur/Spöngin, milli Móavegar og Skólavegar.
- Vegur norðan við Rauðavatn ásamt vegtengingu við Hádegismóa, merkt II gata
- og Aðalbraut.
Skoða göturnar á korti í góðri upplausn.
Spurt og svarað um hámarkshraðaáætlun Reykjavíkur
a) Er um fjölgun hraðaþrepa í hámarkshraða að ræða sem eykur flækjustig og missir þannig marks?
Nei. Ekki er um fjölgun hraðaþrepa að ræða. Leyfilegur hámarkshraði er skilgreindur í umferðarlögum. Innan borgarmarkanna er nú þegar notast við þann hámarkshraða sem hámarkshraðaáætlunin gerir ráð fyrir að notaður verði.
b) Mun lækkun hámarkshraða minnka umferðarflæði og skapa tafir á stofnbrautum?
Nei. Hámarks umferðarrýmd gatnakerfisins og tafir í kringum háannatíma ráðast oftast af afkastagetu gatnamóta, ljósastýringum og annarri umferð. Það er ekki gert ráð fyrir að lækkun hámarkshraða muni hafa mikil áhrif á tafir á háannatíma þar sem á þeim tímapunktum þá hafa umferðarljós og önnur umferð meiri áhrif á raunhraðann en leyfður hámarkshraði.
c) Verða auknar tafir á stofnbrautum sem leiða til þess að umferð færist yfir á íbúagötur?
Nei. Utan háannatíma, þá verður eins og nú greiðasta leiðin fyrir ökumenn að notast við stofnbrautirnar. Því er ekki taldar líkur á að þessi breyting á hámarkshraða muni stuðla að tilfærslu umferðar frá stofnbrautum á íbúagötur.
d) Leiðir breytingin til aukinnar mengunar, útblásturs, hávaða?
Nei. Áhrif umferðar á loftmengun er háð mörgum þáttum, meðal annars vali á fararmáta, akstursstíl, hraða, hröðun og hægingu/stoppum, samsetningu umferðar og aðstæðum á hverjum stað (VV & SKL, 2008). Niðurstöður erlendra rannsókna benda til þess að það sé líklegra að lækkun hámarkshraða hafi jákvæð áhrif á loftmengun en neikvæð. Umferðarhávaði er háður bæði umferðarmagni og umferðarhraða. Rannsóknir sýna að umferðarhávaði frá bílaumferð minnkar með lægri hraða að u.þ.b. 30-40 km/klst. Þess má einnig geta að lægri hraði gerir það meira aðlaðandi að velja aðra fararmáta sem minnka neikvæð umhverfisáhrif vegna umferðar vélknúinna ökutækja.