Stöðugt eftirlit með götulýsingu

Ritstjórn

Íbúar taka virkan þátt í eftirliti með götulýsingu í Reykjavík og eins og gefur að skilja berast flestar ábendingar á þessum árstíma. Ábendingavefur Reykjavíkurborgar http://www.reykjavik.is/borgarland er fljótleg og skilvirk leið til að koma upplýsingum til skila. Sérstakur valmöguleiki er til að kalla fram upplýsingar um staðsetningu götulýsingar og þannig má merkja nákvæmlega þann ljósastaur sem ekki virkar. Símaver Reykjavíkurborgar tekur einnig við ábendingum og starfsmenn þess nota að sjálfsögðu ábendingavefinn til skráningar.

Þátttaka íbúa í þessu gæðaeftirliti er mikilvæg ekki síst þegar horft er til umfangs og kostnaðar vegna götulýsingar. Reykjavíkurborg er með um 21.000 götuljós eða lampa í rekstri og nam kostnaður árið 2011 um 275 milljónum króna. Af því fóru um 105 milljónir til viðhalds, 162 milljónir til orkukaupa og 8,5 milljónir til endurnýjunar.  Flestar ábendingar sem berast beinast að ónýtum perum, en einnig geta aðrar bilanir komið upp og lýsing í heilum götum dottið út og þær má yfirleitt rekja til bilana í strengjum. Orkuveita Reykjavíkur annast viðhald fyrir Reykjavíkurborg og selur orkuna. Þessa dagana er unnið að peruskiptum og viðgerðum víða í Reykjavík en í kjölfar haustlægðanna söfnuðust upp ábendingar. Í ágúst og september var götulýsingakerfið í heild yfirfarið.

Kvikasilfur, natríum og LED



Mismunandi er hvernig staðið er að peruskiptum eftir því hvaða tegund götulýsingar um er að ræða:

  • Kvikasilfurperum er skipt kerfisbundið út á 4 ára fresti og hefur sá tími verið lengdur í sparnaðarskyni. Áður var skipt út á þriggja ára fresti en vegna tækniþróunar hefur líftíminn lengst og gerir þetta mögulegt. Ekki deyr á kvikasilfurperum heldur dofna þær og verða grænleitar undir lok líftíma.

     
  • Natríumperum er skipt út jafnóðum og það slokknar á þeim eða á 4 – 6 ára fresti. Brugðist er við ábendingum íbúa vegna skipta á þeim perum og einnig eru farnar eftirlitsferðir á vegum borgarinnar.

     
  • Um aðrar perutegundir (s.s. málmhalógenperur og einstaka sparperur) gildir það sama og um natríumperur.

     
  • LED ljósgjafar eru ekki eiginlegar perur heldur glóandi rafrás – hálfleiðari. Lítil reynsla er komin á þá tækni, en gert er ráð fyrir 50 – 100.000 lýsingatímum. Í árum talið er það 13 – 27 ár. Þeir lampar sem hafa verið settir upp í Reykjavík eru gefnir upp fyrir 80 þúsund klukkustundir eða um 20 ár.

Í nálægt helmingi lampa í Reykjavík eru kvikasilfursperur (47%) og er það hærra hlutfall en hjá öðrum sveitarfélögum. Sala á kvikasilfurperum verður bönnuð frá og með 1. apríl 2015 og þarf þá að skipta þessum lömpum út fyrir aðrar tegundir. Kvikasilfur var á sínum tíma valið vegna ljósgæða – birtan er hvítari en frá natríum og litarendurgjöf ljóssins betri fyrir mannsaugað en það gerir liti greinilegri og hentar því betur í miðbænum og íbúðargötum. Starfshópur á vegum Reykjavíkurborgar er að skoða framtíðaráherslur í lýsingu og má búast við tillögum frá honum á næsta ári.

Götulýsing bætt að ósk íbúa

Íbúar hafa einnig bent á staði þar sem þörf er á endurbótum og nú í ár hefur verið unnið á nokkrum stöðum í framhaldi af óskum sem íbúar settu á hugmyndavefinn Betri Reykjavík:



• Göngu- og hjólastígur í Elliðaárvogi – 8 ljósastaurar

• Göngu- og hjólastígur bak við Korpuskóla – 4 ljósastaurar

• Göngu- og hjólastígur við Rimaskóla – 8 ljósastaurar

• Göngu- og hjólastígur í Grundarhverfi – 2 ljósastaurar

• Gönguleiðir yfir Langholtsveg og Sundlaugaveg – 6 ljósastaurar

• Göngu- og hjólastígur norð-vestan við Skautahöllina í Laugardal – 4 ljósastaurar

Þessum verkum er að mestu lokið og má sjá upplýsingar um framgang þeirra í framkvæmdasjánni

Nánari upplýsingar: