Leikskólinn Hlíð - Sólhlíð – endurgerð
Aðaluppdrættir
Hvað verður gert?
Leikskólahúsnæði Hlíðar - Sólhlíðar gengst undir heildarendurgerð. Húsið er byggt árið 1952 og því tímabært að uppfæra húsnæðið til nútímakennsluhátta. Um er að ræða eftirfarandi verkþætti:
- Einangrun að utanverðu
- Uppsetning á múrklæðningu og viðgerðir á sprungum í útveggjum
- Gluggar verða endurnýjaðir
- Útihurðir verða endurnýjaðar
- Spartlað og málað innandyra
- Endurnýjun gólfefna og uppsetning nýrra innréttinga og hurða
- Endurnýjun á öllum fráveitulögnum, neysluvatnskerfi og hitakerfi
- Uppsetning loftræsikerfis með nýjum brunalokum og loftstokkum
- Gólfhita og snjóbræðslu verður bætt við þar sem á við
- Raflögnum, tenglum og lýsingu verður skipt út og ljósastýringarkerfi verður innleitt ásamt uppfærslu á brunaviðvörunarkerfi.
- Aðgangsstýringu verður bætt við
- Aðgengismál verða uppfærð og lyftu komið fyrir á norðurgafli hússins
Hvernig gengur?
Apríl 2026
Aprílmánuður hófst á undirslátti undir plötu norðurbyggingar og sögun á plötu í kjölfarið. Einnig var botnplata suðurhluta söguð og fjarlægð ásamt stigahúsi að utan í norðurhluta. Báðar plötur voru svo steyptar í lok mánaðar.
Í byrjun mánaðar hófst einnig veggjasteypa á lyftuhúsi og voru sökklar, plata og veggir á jarðhæð steyptir yfir mánuðinn. Lagnir í jörðu voru færðar til og aðlagaðar viðbyggingu. Veggir 2. hæðar eru 90% klárir.
Tekin var ákvörðun um að rífa og endurnýja þak í heildsinni (niður að sperrum), fjarlægja á stromp og þakglugga. Verðfyrirspurn var send á verktaka sem sendi frá sér tilboð í lok mánaðarins sem var samþykkt.
Í lok mánaðar var þó kominn niðurstaða og hönnun liggur fyrir á stórum verkþáttum sem voru ófyrirséðir (þak og plötur). Almennt er verkið komið á greiða leið og verktaki ætti að geta uppfært verkáætlun.
Þeir verkþættir sem unnið var við í þessum mánuði voru eftirfarandi:
- Sögun og brot á botnplötu suður
- Botnplata steypt í lok mánaðar
- Sögun og förgun á plötu 1.hæð (norður)
- Plata steypt í lok mánaðar
- Steypuvinna á viðbyggingu norðanmegin
- Pípulagnir í kjallara/Gólfhitalagnir lagðar
Mars 2026
Hafist handa við styrkingu burðarvirkis með koltrefjaborðum. Slegið upp fyrir og steyptir stigar á suðurhliðum. Steypu- og lagnavinna í fullum gangi og vinna hafin við uppsetningu innveggja á 2. hæð.
Febrúar 2026
Í febrúar komu í ljós nokkur tæknileg vandamál sem krefjast úrlausnar áður en vinna getur haldið áfram að fullu. Meðal annars þarf að styrkja plötu á milli hæða og hönnunargögn fyrir þakrými eru í vinnslu.
Slagregnsprófun var framkvæmd á tveimur gluggum og leki fannst í útveggjum undir gluggum. Gripið var til viðgerða og prófunin verður endurtekin til að staðfesta að vandinn sé leystur.
Einnig fóru fram framkvæmdir sem fela meðal annars í sér graftarvinnu, steypuvinnu fyrir viðbyggingu (lyftuhús), fjarlægja og förgun byggingarúrgangs í kjallara og undirbúningur vegna frekari styrkingar.
Útistandandi hönnunarmál bíða úrlausnar og mun vinna innandyra hefjast að nýju þegar þau eru leyst.
Janúar 2026
Verktaki vinnur að aðstöðusköpun og framkvæmdir hefjast.
Framkvæmdir hófust í byrjun janúar. Helstu verkþættir mánaðarins voru þrír:
- Gamalt steypuefni fjarlægt úr stigagangi á öllum hæðum.
- Byrjað að undirbúa loftaplötur fyrir styrkingu með sérstökum koltrefjaborðum.
- Rafvirkjar hófu uppsetningu nýrra raflagna, einkum á fyrstu og annarri hæð.
Auk þess voru venjubundnar úttektir á lögnum og gluggum framkvæmdar. Engin slys hafa átt sér stað á tímabilinu.
Á næstu vikum og í febrúar verður haldið áfram uppsetningu raflagna og styrkingu loftsplata. Einnig er áætlað að hefja frekari framkvæmdir við stigagang, undirbúningsvinnu við nýju lyftuhúsi og útifrágang þegar þar að kemur.
Desember 2025
Undirbúningur framkvæmdar hefst með uppsetningu verkaðstöðu verktaka.
Nóvember 2025
Tilboð lægstbjóðanda var endanlega samþykkt þann 12. nóvember 2025.
Startfundur var haldinn í mánuðinum og farið var yfir komandi framkvæmd.
Byggingaráform hafa þegar verið samþykkt af byggingarfulltrúa, nú þarf að skrá byggingarstjóra og iðnmeistara í byggingarframkvæmdinni svo hægt sé að fá byggingarleyfi. Þegar byggingarleyfi er útgefið er hægt að hefja framkvæmdir.
Ágúst 2025
Reykjavíkurborg óskaði eftir tilboðum í framkvæmdarverkið, útboð 16198.
Tilboðum skal skila með rafrænum hætti á útboðsvef Reykjavíkurborgar eigi síðar en: Kl. 10:00 þann 7. október 2025.
Áætluð framkvæmdalok útboðsverksins eru 1. april 2027.
Eftir það taka við skoðanir og úttektir, búnaður og standsetning húsnæðisins.
Ráðgert er að skila húsinu til notenda/skóla- og frístundasviðs í desember 2027.
Júlí 2025
Unnið við að fullgera útboðsgögn.
Sameina þurfti lóðir Engihlíðar 6 og 8 og þinglýsa sameiningu.
Janúar 2025
Aðaluppdrættir samþykktir íog byggingaráform samþykkt í kjölfarið.
Nóvember 2024
Sérteikningar eru í vinnslu ásamt endanlegum útboðsgögnum.
Gert ráð fyrir að hægt verði að bjóða út framkvæmdina fljótlega á nýju ári.
Október 2024
Skipulagsfulltrúi hefur samþykkt tillögu að lyftuhúsi við norðugafl hússins.
Hönnuður er að klára aðaluppdrætti til að leggja til byggingarfulltrúa að nýju
Júlí 2024
Unnið að niðurrifi að innan og nýjar drenlagnir í vinnslu. Hönnun á múrklæðningu og innra skipulagi á lokametrum.
Framkvæmdir við leikskólann eru byggingarleyfisskyldar og verður því allt húsnæðið uppfært til samræmis við gildandi reglugerðir. Er því unnið að hönnun við lyftustokk við húsið svo það standist kröfur um almennt aðgengi.
Maí 2024
Umsókn um álklæðningu að utan synjað af skipulagsfulltrúa. Unnið að öðrum útfærslum til klæðningar.
Júní 2023
Áfram unnið að hönnun, greiningu og niðurrifi. Útlit fyrir að framkvæmdir verði byggingarleyfisskyldar frekar en tilkynningarskyldar sem stækkar umfang verkefnisins umtalsvert.
Mars 2023
Unnið að framkvæmda- og kostnaðaráætlun í kjölfar frekari greiningarvinnu á húsinu. Lykilforsenda framkvæmda er að vatnsverja húsið betur og athugað í samvinnu við skipulagsfulltrúa og Minjastofnun hvort leyfi fáist til að klæða húsið með álklæðningu.
Framkvæmdir við niðurrif efna að innanverðu hafin.
Janúar 2023
Unnið að frekari greiningum á húsnæðinu, sér í lagi á ástandi steypu. Unnið að greiningu og myndun jarðvatnslagna. Unnið að ídælingum og múrviðgerðum kringum glugga.
Október 2022
Úttekt Eflu á arakaástandi og innivist gefin út. Talsverðan raka að greina í kjallara vegna jarðvatnsálags, leka var að greina útfrá gluggum og myglugró að greina í nokkrum efnissýnum. Helstu tillögur til úrbóta felast í klæðningu og einangrun að utanverðu, fjarlægingu rakaskemmdra efna og uppsetningu loftræsikerfis.
Hver koma að verkinu?
Skrifstofa framkvæmda og fasteignaþjónustu Reykjavíkurborgar
Framkvæmdamyndir janúar 2026
Framkvæmdamyndir mars 2023 - desember 2025
