Lóð fyrir 65 íbúðir við Nauthólsveg

Reykjavíkurborg leitar eftir kauptilboðum í byggingarrétt fyrir íbúðarhúsnæði á lóðinni Nauthólsvegur 79.

Vefsíða uppfærð 30. júlí 2023: Kauptilboð hafa verið opnuð og má sjá niðurstöðu neðst hér á síðunni.

Byggingarréttur til sölu

Á lóðinni Nauthólsvegur 79 er heimilt að byggja allt að 65 íbúðir, í 3-5 hæða íbúðarhúsnæði í randbyggð, auk tveggja stakstæðra húsa 2-3 hæða, allt að 5.320 m² ofanjarðar og 2.365 m² neðanjarðar. Gert er ráð fyrir atvinnu- og/eða þjónustuhúsnæði á jarðhæð meðfram hluta Nauthólsvegar og Flugvallarvegar.  Bílastæði verða ofanjarðar og í bílageymslum neðanjarðar. Aðeins lögaðilar geta boðið í byggingarréttinn.

Félagsbústaðir hf., kt. 510497-2799, eiga kauprétt á 6 íbúðum í húsum á lóðinni. Kaupverð hvers birts fermetra á íbúð og geymslu er 490.000 kr., bundið byggingarvísitölu.

Útboðsgögn

Útboðsgögn eru aðgengileg á útboðsvef Reykjavíkurborgar á vefslóðinni: http://utbod.reykjavik.is  
Nýskráning fyrirtækja hefst með því að smella á „Nýskráning“.

Undirrituðum tilboðum skal skila með rafrænum hætti á framangreindan útboðsvef Reykjavíkurborgar eigi síðar en kl. 12:00 fimmtudaginn 29. júní 2023.
Gæta skal þess að tilboð lögaðila séu staðfest af þeim sem hefur/hafa heimild til að skuldbinda félagið.

Niðurstaða útboðs er birt á útboðsvef Reykjavíkurborgar.

• Sjá meira um lóðir og lóðarleigusamninga