Rekstrarkostnaður sviðsins var sem fyrr segir 4.611 m.kr. en þar af var rekstur upplýsingatækniþjónustu samtals 2.690 m.kr og var stærsti einstaki rekstrarþátturinn, eða um 58% af heildarrekstrarkostnaði sviðsins.  

Upplýsingatækniþjónusta var samtals 539 m.kr. umfram fjárheimildir ársins. Þar af var innri leiga eignasjóðs 177 m.kr. umfram áætlun. Annar rekstrarkostnaður hefur einnig aukist talsvert vegna þjónustusamninga sem margir eru bundnir við vísitöluhækkanir.

Þá hefur tæknileg þjónustuþörf við starfsstaði orðið meiri á síðustu árum ásamt því að starfsstöðum hefur fjölgað og flutningur starfsstaða hefur aukist, m.a. vegna myglu og viðhalds bygginga. Til þess að mæta þessum þörfum hefur þurft að bæta við verktökum við utanumhald og viðhald á UT-innviðum borgarinnar.

Rekstrarkostnaður rekstrarþjónustu sviðsins, það er rekstrarkostnaður Höfðatorgs og Ráðhússins, var samtals 548 m.kr. eða um 12% af heildarrekstrarkostnaði sviðsins.  

Rekstrarþjónusta var 58 m.kr. yfir áætlun ársins. Umfang vinnu og afleidds kostnaðar vegna framkvæmda við endurnýjun lykilinnviða Ráðhúss voru umfram áætlanir á árinu. Skýrist þetta meðal annars af mun umfangsmeiri þörf á vinnu við viðhald fasteigna og rafmagnsinnviði. Þá hefur kostnaður aukist vegna rafmagnshækkana og efldrar öryggisvörslu í stjórnsýsluhúsum.

Heildarrekstrarkostnaður við þjónustu og umbreytingu var samtals 409 m.kr. eða um 9% af heildarrekstrarkostnaði sviðsins.