Framtíð skóla- og frístundastarfs í Laugardal

Í sumar hefur verið unnið að mótvægisaðgerðum og lagfæringum í skólunum þremur, Laugarnesskóla, Laugalækjarskóla og Langholtsskóla til að tryggja bætta innivist þar til kemur að viðgerðum hvers skóla fyrir sig. 

Sýnu mikilvægast var að grípa til aðgerða í Laugarnesskóla og hefur verktakafyrirtækið Ístak unnið að lagfæringum í 16 rýmum í skólanum. Stuðst er við úttektarskýrslu EFLU frá apríl síðastliðnum og er helst unnið að því að fjarlægja efni þar sem greinst hefur mygla svo sem gamla einangrun og gólfdúka. Rannsóknir hafa sýnt að fyrri mótvægisaðgerðir hafa gefist vel og því stuðst við þá reynslu.

Að sama skapi er unnið að mótvægisaðgerðum í Langholtsskóla þar sem verið er að skipta um gólfdúka þar sem mælst hefur raki. Jafnframt hafa staðið yfir gluggaskipti í C álmu sem er hluti af endurnýjun álmunnar.

Í Laugarlækjarskóla er unnið að undirbúningi aðgerða svo sem ástandsskoðun á stjórnendarými til að undirbúa viðgerðir þar. Skipt hefur verið um nokkra glugga í skólanum og liggur fyrir undirbúningur fyrir frekari gluggaskiptum.

Yfirstjórn Reykjavíkurborgar ákvað í vor að fá ytri verkefnisstjóra til verkefnisins til að samþætta fyrirhugaðar framkvæmdir varðandi skólamál í Laugardal.

Eftir skoðun á stöðu mála við skólana þrjá, Langholtsskóla, Laugarnesskóla og Laugalækjarskóla, var ákveðið að leggja áherslu á að endurnýja veðurkápur skólanna og gera þær vatn og rakaheldar til að stöðva og koma í veg fyrir skemmdir. Unnið er að undirbúningi svo unnt verði að hefja framkvæmdir við skólana á næsta ári.

Unnið er með Minjastofnun svo húsin fái að njóta sinna sérkenna. Laugarnesskóli er friðaður og ætlunin er að meðhöndla Langholtsskóla með sama hætti enda húsin glæsileg og bera sérkenni síns tíðaranda sem mikilvægt er að vernda.

Unnið er með þá hugmynd að allir skólarnir verði einangraðir og múraðir að utan með viðurkenndum og góðum efnum, en þó þannig að þeir haldi núverandi útliti og hlutföllum. Framkvæmdirnar verða viðamiklar og hefjist á næsta ári. Stefnt að því að byrja á yfirferð og endurnýjun drenlagna í kringum alla skólana og áætlað að vinna við gluggaskipti hefjist á vormánuðum. 

Gerður hefur verið samningur við verkfræðistofuna Verkvist ehf. um að gera samræmda ástandsskoðun á Laugarnesskóla, Laugalækjarskóla og Langholtsskóla.

Úttektir hafa verið gerðar á afmörkuðum stöðum í skólunum í gegnum tíðina en nú fer fram heildarskoðun á skólum þremur og samræmt mat á ástandi þeirra. Með þessu fæst heilstætt yfirlit yfir skólana sem notað verður við ákvarðanir og forgangsröðun verkefna og hversu ítarlegra viðgerða er þörf.

Í samningi við Verkvist er óskað eftir að gert verði m.a. mat á eftirfarandi þáttum:

• ítarleg ástandsskoðun á ytri hjúp mannvirkja og kanna ástand steypu í útveggjum.
• Meta ástand innnandyra í skólunum. 
• Meta ástand þaka og kjallara. 
• Mynda og kortleggja ástand vatnslagna, drens, regnvatnslagna og fráveitu.
• Kanna ástand tæknikerfa svo sem rafkerfa, hitakerfa og loftræsikerfa. 
• Meta ástand hljóðvistar, inniveggja, gólfefna, salerna og annarra rýma. 
• Þá er óskað eftir að skoðað verði ástand bruna- og öryggismála. 

Er þess vænsts að allar úttektirnar verði allar tilbúnar fyrir lok árs 2024 og liggi þá til grundvallar fyrir frekari vinnu.

Í haust hefst vinna með sérfræðingum skóla- og frístundasviðs ásamt skólastjórnendum Langholtsskóla, Laugalækjarskóla og Laugarnesskóla (3L skóla) og starfsfólki vegna þeirra breytinga sem fyrirhugaðar eru á skólastarfi í skólunum. Horfa þarf sérstaklega til hvers skóla fyrir sig og eins allra skólana í samhengi því nú breytast allir skólarnir í yngri barna skóla gangi áform eftir.

Áformað er að vinnan verði unnin í sprettum þar sem fundað verður með skólafólki og sérfræðingum auk þess sem arkitektar verða til aðstoðar. Þeir munu síðan vinna úr þeim niðurstöðum sem fást á hverjum stað og samræma á milli skóla. Vonir standa til að það takist að fanga og lyfta upp þeirri þekkingu sem býr í hverju skólasamfélagi fyrir sig og miðla áfram inn í það skólaumhverfi sem er í mótun.