Framtíð skóla- og frístundastarfs í Laugardal

Unnið er að framtíðarmótun skóla- og frístundastarfs í Laugardal. Upplýsingum um ákvarðanir, undirbúning og framkvæmdir verður miðlað á þessari síðu.

Framtíð í mótun

Skóla- og frístundaráð hefur samþykkt að halda áfram vinnu sem snýr að þróun og byggingu safnskóla á unglingastigi í Laugardal en með breytingum sem taka eins og kostur er tillit til athugasemda um breytingar á skólahverfum. Þannig munu Laugarnesskóli og Laugalækjarskóli áfram tilheyra sama skólahverfi.

Grunnskólarnir þrír sem fyrir eru í hverfinu munu allir vera skólar fyrir yngri árganga: Langholtsskóli fyrir nemendur í 1.– 7. bekk, Laugarnesskóli fyrir nemendur í 1.– 4. bekk og Laugalækjarskóli fyrir nemendur í 5.- 7. bekk.

Skólarnir vinna allir eftir sameiginlegri framtíðarsýn og stefnu: Menntastefnu Reykjavíkurborgar. Stefnan leggur áherslu á framsækið skóla- og frístundstarf þar sem öll börn hafa jöfn tækifæri til náms í fjölbreyttu námsumhverfi sem samræmist þeirra áhuga og hæfileikum.

Safnskóli á unglingastigi

Bygging safnskóla á unglingastigi og viðhaldsframkvæmdir

Eftir samráð við skólastjórnendur, nemendur og foreldra í hverfinu eru línur farnar að skýrast varðandi framtíðarfyrirkomulag skóla- og frístundastarfs í Laugardal. Skóla- og frístundaráð samþykkti þann 9. desember 2024 að halda áfram vinnu sem snýr að þróun og byggingu safnskóla á unglingastigi (svokölluð sviðsmynd 4) en með breytingum sem taka eins og kostur er tillit til athugasemda um breytingar á skólahverfum. Þannig munu Laugarnesskóli og Laugalækjarskóli áfram tilheyra sama skólahverfi. Ráðist verður í umfangsmikið viðhald og framkvæmdir á Laugarnesskóla, Laugalækjarskóla og Langholtsskóla samhliða byggingu nýs safnskóla.

Áætlað er að unglingaskólinn muni rísa á svokölluðum þríhyrningi milli Skautahallarinnar og félagsheimilis Þróttar og Ármanns. Skólinn verður fyrir unglinga í 8. – 10. bekk af skólasvæði skólanna þriggja; Langholtsskóla, Laugarnesskóla og Laugalækjarskóla. Einnig er gert ráð fyrir á þessu stigi að unglingar sem búa á nærliggjandi uppbyggingareitum, við Grensásveg, á Orkureitnum og í Skeifunni, muni stunda nám í skólanum. Í samráðsferlinu komu fram áhyggjur að unglingaskólinn verði of fjölmennur ef uppbyggingareitirnir tilheyri skólahverfinu og verða þær áætlanir endurskoðaðar árið 2026 þegar fjöldi íbúa og samsetning verður orðin skýrari.

Yngri barna skólar

Langholtsskóli, Laugalækjarskóli og Laugarnesskóli verða yngri barna skólar

Í stærstum hluta umsagna sem bárust eftir kynningar á sviðsmynd 4 (umsögnum sem ætlað var að styðja við sviðsmynd 1) komu fram athugasemdir sem beindust að hugmyndum um að skipta upp skólahverfinu í Laugarnesi og þar með aldurshópum barna. Samkvæmt áætlunum sem samþykktar voru í skóla- og frístundaráði í dag er nú gert ráð fyrir að börnin í skólahverfinu verði áfram saman eftir aldurshópum. Þannig verða yngstu árgangarnir (1.-4. bekkur) í Laugarnesskóla og miðstigið (5.-7. bekkur) í Laugalækjarskóla.

Frístundastarf og skólahljómsveit

Samhliða viðhaldsaðgerðum í skólunum þremur þarf að huga að aðstöðu fyrir frístunda- og félagsmiðstöðvastarf.

Gera þarf ráð fyrir frístundaheimilum fyrir 1. og 2. bekk í Laugarnesskóla og Langholtsskóla. Auk þess sem rýna þarf staðsetningu safnfrístundaheimilis í Fjölskyldu- húsdýragarðinum fyrir nemendur í 3. og 4. bekk í sömu skólum.

Gera þarf aðstöðu fyrir félagsmiðstöðvastarf fyrir 5. - 7. bekk í Laugalækjarskóla og Langholtsskóla. Yfirfara þarf aðstöðu sértæku félagsmiðstöðvarinnar Hofs sem nú er við Laugalækjarskóla. Einnig þarf að gera ráð fyrir aðstöðu fyrir skólahljómsveit Austurbæjar í Laugalækjarskóla.

Aðstaða fyrir félagsmiðstöðvastarf á unglingastigi verður í safnskólanum.

Öflugt starfsfólk og gott skólastarf

Það er mat skóla- og frístundasviðs, bæði út frá skóla- og frístundastarfi og framkvæmdum, að sviðsmynd 4 með þeim breytingum sem gerðar hafa verið, sé vænlegust skóla- og frístundasamfélaginu í Laugardal bæði til skemmri og lengri tíma.

Í skólunum þremur starfar öflugt starfsfólk og skólastarf í öllum skólunum til eftirbreytni. Ljóst er að breytingum fylgir rask bæði fyrir starfsfólk og nemendur en með gott fólk innanborðs standa vonir til að hægt verði að halda í það góða og nýta jafnframt tækifæri til frekari þróunar skólastarfsins.