Reykjavik
Kominn er tími á viðhald í Laugardalslaug og þarf því að loka lauginni tímabundið. Áætlaður framkvæmdatími er tvær vikur og verður sundlauginni, sem er sú stærsta í Reykjavík, lokað fyrir almenning frá þriðjudeginum 26. september. Sundæfingar og skólasund helst óbreytt þrátt fyrir lokunina.
Viðhald á lauginni hefur staðið til í nokkurn tíma. „Viðhaldslokun á útilaugarkeri Laugardalslaugar er löngu tímabær en langt er liðið frá síðustu viðhaldslokun,“ segir Árni Jónsson, forstöðumaður í Laugardalslaug. „Fara þarf í endurbætur á hluta af kýraugum í laugarkeri, koma fyrir þili á milli laugarkera, fara í endurbætur á yfirfallslögn, lagfæringar á flísalögn og ýmis önnur viðhaldsverkefni. Jafnframt verður unnið að ýmsum þrifum sem ekki er hægt að komast í þegar gestir eru í lauginni.“
Upplýsingar um framvindu á samfélagsmiðlum Laugardalslaugar
Stefnt er að því að opna heita potta eins fljótt og aðstæður leyfa. Sundæfingar og skólasund helst óbreytt en meðan á viðhaldslokun stendur munu krakkar í skólasundi og iðkendur sem æfa sund nota gömlu afgreiðsluna, þar sem þeirri nýju verður lokað. Opið verður hjá nuddaranum sem starfar í Laugardalslaug.
Samkvæmt verkáætlun tekur verkefnið tvær vikur, en óvissuþættir í verkinu geta haft áhrif á framkvæmdatíma og þann tíma sem laugin þarf að vera lokuð. Upplýsingar verða birtar reglulega á Facebooksíðu og Instagramsíðu Laugardalslaugar, um verkið og hvernig því miðar áfram.
Aðrar sundlaugar standa gestum opnar
Reykjavík rekur átta sundlaugar víðs vegar í borgarlandinu og í sundlaugarnar eru ávallt öll velkomin. Tilvalið er fyrir fastagesti Laugardalslaugar að nota tækifærið og prófa hinar laugarnar, þær hafa allar sinn sjarma og séreinkenni. Sjáumst í sundi!
Nánar um helstu verkliði í Laugardalslaug:
- Kýraugu - skipta út að minnsta kosti 15 kýraugum í laugarkeri
- Þil á milli laugarkera - fjarlægja þil og setja upp nýtt þil undir brú. Með því að aðskilja laugarker með þili eru bundnar vonir við að auðveldara verði að hækka hitastig barnalaugar
- Yfirfallsrenna í öllu laugarkeri - hreinsun á rennu með háþrýstiþvotti, viðgerð á rennunni og leki stoppaður á yfirfallslögn þar sem það á við
- Lendingarlaug - málun og lagfæringar
- Laugarker - lagfæringar á flísum
- Sjópottur - áhersla á að fylla í flísalögn með fúgu og hreinsa pottinn vel
- Aðrir pottar - hreinsun
