![Flóttafólk frá Palestínu í skóla- og fjölskyldumiðstöð](/sites/default/files/styles/landscape_small/public/2024-07/448722228_837437021163188_5766898155809901553_n_custom.jpg?h=707772c7&itok=FcKnjk6l)
Síðasti dagur skóla- og fjölskyldumiðstöðvar fyrir fólk sem nýverið hefur komið hingað til lands frá Gaza endaði í Heiðmörk í blíðskaparveðri fimmtudaginn 27. júní. Miðstöð útivistar og útináms stóð fyrir fjörinu þar sem var grillað og farið í allskyns skemmtilega leiki.
![Flóttafólk frá Palestínu í skóla- og fjölskyldumiðstöð](/sites/default/files/styles/original_medium/public/2024-07/448842752_958885885985422_3800191544111547428_n_custom.jpg?itok=DangtD6G)
Mjúk lending í íslensku samfélagi
Þau sem sótti skóla- og fjölskyldumiðstöðina voru afar þakklát fyrir starfsemina og þessa mjúku lendingu í íslenskt samfélag sem hún hefur boðið. „Þau hefðu gjarnan viljað vera lengur,“ segir Saga Stephensen, verkefnastjóri fjölmenningar í leikskóla á skóla- og frístundasviði. Miðstöðin hefur verið opin alla virka daga frá því um miðjan apríl og hafa að meðaltali um 40 mætt á hverjum degi og upp í 70 þegar mest hefur verið. Þar hefur farið fram íslenskukennsla og kynning á íslensku samfélagi sem bæði börn og fullorðnir hafa tekið þátt í. Í haust munu börnin svo fara í sína hverfisskóla með það veganesti sem þau hafa fengið í skóla- og fjölskyldumiðstöðinni.
![Flóttafólk frá Palestínu í skóla- og fjölskyldumiðstöð](/sites/default/files/styles/original_medium/public/2024-07/448723445_458920190201340_4866280234161136096_n_custom.jpg?itok=LMFR1tXY)
Síðustu vikuna fór hópurinn í heimsókn í samfélagshúsið í Bólstaðarhlíð þar sem Reykvíkingum býðst að taka þátt í ýmiskonar félagsstarfi. Þeim leist vel á starfið þar meðal annars boðið að vera gestgjafar á viðburði á vegum Borgarbókasafnsins sem fólst í því að útbúa mat fyrir pikknikk á Klambratúni.