Takk fyrir komuna á Fjölmenningarþing Reykjavíkurborgar
Mikilvæg og þörf umræða um fjölmenningarmál fór fram á Fjölmenningarþingi Reykjavíkurborgar sem var haldið um liðna helgi í Hinu húsinu við Rafstöðvarveg.
Yfirskrift þingsins í ár var Að tilheyra – Belonging og helstu áherslurnar voru samskipti, viðhorf og lýðræði. Reykjavíkurborg er fjölmenningarborg og eru um fjórðungur íbúa hennar af erlendum uppruna. Hátt í 70 manns sóttu þingið og var boðið upp á 8 málstofur og kynningar þar sem málefni fjölmenningar voru skoðuð frá ýmsum hliðum.
Eliza Reid forsetafrú stýrði málstofu um bókmenntir og hversu mikilvægar þýðingar eru, því góð þýðing getur opnað aðra heima og miðlað menningu. Auk hennar tóku þátt þau Hallgrímur Helgason, rithöfundur, Veronika Egyed og Luciano Dutra þýðendur og ræddu þau meðal annars um hvort góð þýðing á bókmenntum geti falið í sér inngildingu.
Í fyrsta sinn var boðið upp á málstofu sem var sérstaklega ætluð ungu fólki af erlendum uppruna á aldrinum 13-18 ára. Þar gátu ungmennin rætt um upplifun sína í samfélaginu og reynslu sína af því hvernig er að vera ungmenni af erlendum uppruna á Íslandi.
Um 30 manns sóttu málstofu um samfélagstúlkun, fyrir fagfólk og aðila sem nota þjónustu túlka í starfi sínu. Samfélagtúlkur miðlar munnlegri merkingu á milli aðila sem tala ekki sama tungumál og tekur ekki afstöðu til viðfangsefnisins. Þátttakendum málstofunnar gafst tækifæri til að tjá sig um framtíð samfélagstúlkunar á Íslandi og unnu þau að lausnum til að endurskipuleggja nám í samfélagstúlkun við Háskóla Íslands.
Fjölmenningarþing er mikilvægur vettvangur, sem skapar rými fyrir fólk til að hittast, fræðast, mynda tengsl og kynnast hvort öðru og ræða málefni sem snerta á fjölmenningu og inngildingu.
Sjáumst að ári!