Íbúðir og atvinnulíf í Vesturbugt

Lóðirnar í Vesturbugt eru Hlésgata 1 og 2. Heimilt er að byggja allt að 177 íbúðir í 2-5 hæða húsum auk bílakjallara og um 1.420 fermetra af atvinnuhúsnæði. Byggingarréttur er seldur á rúmlega 2,8 milljarða og álögð gatnagerðargjöld eru um 330 milljónir. Greiðslur til Reykjavíkurborgar nema því um 3,2 milljörðum króna. 

Fjórðungur íbúða verður leiguíbúðir

Að lágmarki 25% íbúða á byggingarreitnum eiga að vera leiguíbúðir samkvæmt deiliskipulagi. Þar af eiga Félagsbústaðir kauprétt á allt að 14 íbúðum og Félagsstofnun stúdenta á kauprétt á allt að 50 íbúðum. 

Framkvæmdir á næsta ári

Uppbygging í Vesturbugt hefur verið nokkuð lengi á dagskrá en byggingarétturinn var boðinn út að nýju í júlí og var M3 fasteignaþróun ehf. hæstbjóðandi og nú hefur verið gengið frá samningum við félagið.

„Það er frábært að geta nú loksins hafið hönnun og byrjað að skipuleggja uppbyggingu á þessum einstöku byggingarreitum við vesturhöfnina við miðborg Reykjavíkur,“ segir Örn V. Kjartansson framkvæmdastjóri M3 fasteignaþróunar ehf.  „Segja má að þetta sé síðasti þéttingarreiturinn í miðborginni og í raun einstakt að geta boðið íbúðir til sölu þetta nálægt gömlu höfninni í Reykjavík. Ef vel gengur með hönnun má gera ráð fyrir að framkvæmdir hefjist snemma vors á næsta ári“.  

Tengt efni:

• Samþykkt úthlutun lóðar og sala byggingarréttar: Skoða erindi fyrir borgarráð
• Auglýsing frá júlí 2024:  Kauptilboð í spennandi byggingarrétt í Vesturbugt  
• Frétt 21. júní 2024: Byggingarlóðir í Vesturbugt boðnar út á ný  
• Frétt 30. júní 2023: Reykjavíkurborg hefur rift samningi um uppbyggingu í Vesturbugt