Hlutfalla virkra ferðamáta hjá börnum á leið í skóla, það er þeirra sem fara fótgangandi eða nota einhverskonar hjól, mældist 74% í þessari mælingu en var 78% 2022. Þetta hlutfall mældist lægst 64% árið 2010 en hefur verið á uppleið síðan. Hlutfall virkra ferðamáta hjá 18 ára og eldri mældist 24% í þessari mælingu og fer vaxandi en var 11% 2008 þegar það var lægst.
Árlega leggur Gallup fyrir spurningar um ferðavenjur borgarbúa til vinnu/skóla fyrir umhverfis- og skipulagssvið Reykjavíkurborgar. Gagnaöflun fór fram í október 2023 og hefur verið gerð með sambærilegum hætti frá 2008.
Hvernig börnin fóru í skólann og fullorðnir í vinnu eða skóla
Rúmlega 63% fullorðinna ferðast á bíl sem bílstjórar til vinnu eða skóla, 5% sem farþegar í bíl þannig að samanlagt er hlutdeild einkabílsins sem ferðamáta 68%. Almenningssamgöngur (strætó) eru notaðar af 8% fullorðinna Reykvíkinga. Hlutfall þeirra sem fer fótgangandi er 12%, 8% á hjóli, 2% ferðast á rafmagnshlaupahjóli og jafnmargir á rafmagnshjóli. Samanlagt er hlutdeild virkra ferðamáta því 24%.
Fullorðnir
- Helstu breytingar á milli ára eru að færri keyra til vinnu en áður.
- Hlutfall þeirra sem nota virka ferðamáta til vinnu eykst en hlutfall sem notar einkabíl minnkar.
- Hlutfall almenningssamgangna hækkar á milli mælinga en hefur verið hærra ef litið er lengra aftur í tímann.
Ýmsar áhugaverðar upplýsingar koma fram þegar rýnt er í greiningar eftir lýðfræði:
- Konur ganga frekar til vinnu eða skóla en karlar eru líklegri til að hjóla. Fólk á aldrinum 18-34 ára er duglegra að nota strætó en þeir sem eldri eru. Fólk sem býr fjær miðbænum notar einkabílinn frekar til að ferðast til vinnu eða skóla.
Börnin
- Færri börn nota virka ferðamáta í ár en í fyrra á leið í skóla en munurinn er ekki marktækur. Þeim fækkar sem fara fótgangandi en þeim sem ferðast á hjóli, hlaupahjóli og rafmagnshlaupahjóli fjölgar lítillega.
- Fleiri börnum er skutlað á einkabíl í skólann en í fyrra en vert er að taka fram að hlutfallið var heldur í lægra lagi þá miðað við eldri kannanir. Núna er þetta svipað og árið 2021.
- Börn sem hjóla eða ganga, þ.e. nýta virka ferðamáta á leið í skólann eru 74%.
- Þeim fækkar heldur frá í fyrra sem nýta almenningssamgöngur, þ.e. strætó eða skólabíl, á leið í skólann en nú mælist það hlutfall 5% en var 10% 2021.
- Nauðsynlegt er þó að benda á að niðurstöður fyrir börn byggja á mun færri svörum en meðal fullorðinna og eru því með hærri vikmörk.
Könnunin var netkönnun, úrtakið var 1808 manns og þátttökuhlutfall tæplega 50%.
Virkir ferðamátar styðja við lýðheilsu
Breyttar ferðavenjur tengjast áherslum um þróun borgarinnar, lýðheilsu borgarbúa og loftslagsmálum. Í Aðalskipulagi Reykjavíkur kemur meðal annars fram markmið um að hlutfall ferða á bíl verði 50% fyrir árið 2040. Virkir ferðamátar styðja við bætta lýðheilsu íbúa í borginni. Breyting á ferðavenjum er mikilvæg til þess að draga úr losun gróðurhúsalofttegunda í Reykjavík en 70% allrar losunar er vegna samgangna.