Unnið er við nýjar íbúðir um alla borg og í dag eru um 3.100 íbúðir á framkvæmdastigi. Þá eru 4.300 íbúðir þegar deiliskipulagðar. Einnig eru staðfest áform upp á 4.100 íbúðir í samvinnu við húsnæðisfélög sem ekki eru rekin í hagnaðarskyni i því skyni að fjölga íbúðum á viðráðanlegu verði. Þetta kom fram á árlegum fundi um húsnæðisuppbyggingu í Reykjavík sem haldinn var í ráðhúsinu í morgun.
Dagur B. Eggertsson borgarstjóri fór yfir helstu svæðin sem eru í uppbyggingu, samstarfið við húsnæðisfélögin og framtíðarsýn húsnæðismála í Reykjavík. „Uppbyggingin gengur mjög hratt núna. Við erum einfaldlega stödd á mesta uppbyggingarskeiði í húsnæðismálum í sögu borgarinnar," sagði hann.
Þá sagði Dagur mikilvægt að sveitarfélögin láti til sín taka í húsnæðismálum, ekki bara með sölu byggingarréttar eða úthlutun lóða heldur líka með því að tryggja blöndun íbúabyggðar, tryggja íbúðir á viðráðanlegu verði og fjölgun félagslegra íbúða. „Reykjavík er eina sveitarfélagið á höfuðborgarsvæðinu sem ætlar að fjölga félagslegum íbúðum svo einhverju nemi – og við eigum hlutfallslega langflestar íbúðir allra sveitarfélaga á höfuðborgarsvæðinu og eftir að áformin okkar verða að veruleika munum við eiga meira en 5% allra íbúða í Reykjavík fyrir þá sem standa höllum fæti. Ef önnur sveitarfélög myndu gera sambærilegt átak, þá væru biðlistar úr sögunni, segir Dagur B. Eggertsson borgarstjóri.
Sérstök áhersla verður einnig lögð á fyrstu kaupendur og nýjar leiðir í húsnæðisuppbyggingu. Verður horft til nýrra svæða í Gufunesi, Ártúnshöfða og Skerjafjarðar og auglýst eftir samstarfsaðilum sem vilja koma að slíkri uppbyggingu og geta teflt fram áhugaverðum lausnum.
Þá var tilkynnt um að úthlutun lóða gengi einnig vel í Reykjavík. Í borgarráði í gær var úthlutað lóðum fyrir um 530 íbúðir hefur þá í heild verið úthlutað lóðum fyrir 1.435 íbúðir í ár.
Eins og áður segir eru 3.100 íbúðir í byggingu og eru þær á eftirtöldum svæðum:
- Efstaleiti: 360 íbúðir
- Hlíðarendi : 780 íbúðir
- Smiðjuholt: 203 íbúðir
- Bryggjuhverfi II - 280 íbúðir
- Grandavegur: 142 íbúðir
- Hljómalindarreitur: 35 íbúðir
- Hverfisgata 92-96: 60 íbúðir
- Hafnartorg-Austurhöfn: 178 íbúðir
- Brynjureitur: 77 íbúðir
- Frakkastígsreitur: 68 íbúðir
- Tryggvagata 13: 40 íbúðir
- Mánatún: 44 íbúðir
- Borgartún 28: 21 íbúð
- Nýlendurreitur: 20 íbúðir
- Suður-Mjódd: 130 íbúðir
- Reynisvatnsás: 50 íbúðir
- Höfðatorg I: 94 íbúðir
- Mörkin: 74 íbúðir
- Barónsreitur-Hverfisgata 85-93: 70 íbúðir
- Sogavegur 73-77: 45 íbúðir
- Sigtúnsreitur: 108 íbúðir
- Keilugrandi 1: 78 íbúðir
- Skógarvegur: 20 íbúðir
- Úlfarsárdalur – núverandi hverfi: 100 íbúðir
- Laugavegur 59: 11 íbúðir
- Hverfisgata 61 12 íbúðir
Alls: 3.100 íbúðir
Streymi af fundinum, kynningarglærur og fleira tengt efni er aðgengilegt á vefsíðunni reykjavik.is/ibudir