Borgarlögmaður lagði fram álit um fylgni við innkaupareglur vegna framkvæmda við þrjár byggingar við Nauthólsveg 100 á fundi innkauparáðs í dag.
Á fundi innkauparáðs í dag lagði borgarlögmaður fram álit um fylgni við innkaupareglur við gerð samninga um Nauthólsveg 100.
Niðurstaða borgarlögmanns er sú að skrifstofa eigna og atvinnuþróunar hafi ekki brotið lög með gjörningum sínum en brotið hafi verið gegn innkaupareglum Reykjavíkurbogar.
Borgarlögmaður greinir einnig frá því í álitinu að tafir við framlagningu álitsins stafi af því að upplýsingar frá skrifstofu eigna og atvinnuþróunar lágu ekki fyrir fyrr en 15. október sl. Kemur fram í álitinu að borgarlögmaður hafi áður upplýst innkauparáð um tafir á afhendingu upplýsinga og gagna á fundum ráðsins en að ráðið hafi ekki bókað um þær sérstaklega á fundum sínum.
Borgarlögmaður kemst að þeirri niðurstöðu að verkefnið hafi ekki verið útboðsskylt samkvæmt þágildandi lögum um opinber innkaup nr. 84/2005 og sé því ekki um brot á þeirri löggjöf að ræða í tilviki endurbyggingar á húsaþyrpingunni við Nauthólsveg 100.
Innkauparáð telur að álitið nýtist vel við endurskoðun innkaupareglna sem nú stendur yfir.