Viðburði vegna tendrunar Friðarsúlunnar í Viðey aflýst
Viðburði vegna tendrunar Friðarsúlunnar í Viðey, fimmtudaginn 9. október, hefur verið aflýst vegna mikils sjógangs og ölduhæðar á Faxaflóa.
Venju samkvæmt hefur verið haldin friðsæl athöfn við tendrun Friðarsúlunnar til að heiðra minningu tónlistarmannsins John Lennons. Friðarsúlan er hugarfóstur myndlistarmannsins, tónlistarmannsins og friðarsinnans Yoko Ono og er hugsuð sem leiðarljós fyrir heimsfriði. Ljós Friðarsúlunnar verður eftir sem áður tendrað klukkan 20.00 í kvöld, á fæðingardegi eiginmanns hennar John Lennons.
Elding sem sér um ferjuferðir út í Viðey segir aðstæður óhagstæðar til siglinga yfir sundið og hefur aflýst öllum ferjuferðum í dag. Þó veður geti virst ágætt skal öryggi ávallt haft í fyrirrúmi og því er þessi ákvörðun tekin í samráði við þá sem að viðburðinum koma og viðbragðsaðila.
Þrátt fyrir að viðburðinum sé aflýst þá er tilvalið að fylgjast með tendruninni í beinu streymi á heimasíðu IMAGINE PEACE TOWER klukkan 20.00 spila Imagine, lag Lennons, og hugsa um frið.