Undirrituðu samning til þriggja ára um Höfða friðarsetur
Heiða Björg Hilmisdóttir borgarstjóri og Silja Bára Ómarsdóttir, rektor Háskóla Íslands, undirrituðu á dögunum þriggja ára samstarfssamning Reykjavíkurborgar og Háskóla Íslands um Höfða friðarsetur.
Höfði friðarsetur var stofnað árið 2016 og hefur það að markmiði að stuðla að þverfræðilegum og alþjóðlegum rannsóknum í friðar- og átakafræðum, styðja við upplýsta stefnumótun og auka framboð á kennslu og fræðslu fyrir almenning á sviði friðar- og átakafræða.
Með samningnum, sem gildir frá 2026–2028, skuldbinda Reykjavíkurborg og Háskóli Íslands sig til að vinna að friði í heiminum, jafnt innanlands sem utan. Stofnunin stendur meðal annars fyrir alþjóðlegri ráðstefnu á ári hverju, þar sem sjónum er beint að friðarmálum. Í ár var ráðstefnan haldin þann 10. október undir yfirskriftinni The Imagine Forum – Protecting Rights – Defending Peace. Lögð var áhersla á að skoða hvernig vaxandi einræðishyggja, hnignun lýðræðis og bakslag í mannréttindum ógnar grundvallarforsendum friðar. Sérstaklega var horft til þess hvernig þessar áskoranir birtast í borgum og hafa áhrif á líf almennra borgara, þar sem lýðræðisleg þátttaka, öryggi og aðgengi að réttindum eru lykilforsendur félagslegrar samheldni.
Með samningnum skuldbindur Reykjavíkurborg sig til að greiða 12,5 milljónir á ári til verkefnisins. Háskóli Íslands hýsir verkefnið innan Alþjóðamálastofnunar HÍ og leggur verkefninu til starfsaðstöðu, vinnuframlag og verkefnisstjóra.