Sumarstörf fyrir 17 ára ungmenni
Borgarstjórn samþykkti í apríl síðastliðnum að setja sérstakt fjármagn í ráðningar 17 ára ungmenna í sumarstörf til að koma betur til móts við þann hóp.
100 fjölbreytt störf
Um er að ræða 100 störf og eru þetta fjölbreytt störf m.a. með börnum, öldruðum og í umhirðu borgarlandsins.
Borgarstjórn samþykkti ennfremur að hluti þessara 100 starfa skuli sérstaklega taka mið af 17 ára ungmennum í viðkvæmri stöðu með það að markmiði að styðja þau til atvinnuþátttöku.
Biðlisti sumarstarfa
Þau 17 ára ungmenni sem hafa ekki enn sótt um sumarstarf en hafa áhuga á því, eru hvött til að kynna sér þau störf sem eru í auglýsingu um þessar mundir. Að auki má sækja um á biðlista vegna sumarstarfa. Biðlistinn er opinn öllum einstaklingum sem eiga lögheimili í Reykjavík.
Ef ekki tekst að manna stöður með umsækjendum sem þegar hafa sótt um innan umsóknarfrests, er leitað eftir fólki á biðlistanum. Æskilegt er að umsækjendur svari spurningum um hvar og við hvað þeir myndu helst vilja starfa.
Athuga ber að skráning á biðlista jafngildir ekki boði um starf.
Sumarstörf í borginni
Reykjavíkurborg auglýsti sumarstörf í febrúar og vakin er athygli á því að enn er hægt að sækja um sumarstörf hjá borginni.
Nánari upplýsingar veitir skrifstofa ráðninga og mönnunar: mannaudur@reykjavik.is