Sjáumst á Vetrarhátíð 2025

Vetrarhátíð verður haldin dagana 6.- 9. febrúar næstkomandi. Undirbúningur fyrir hátíðina er í fullum gangi og fjöldi listamanna, bæði erlendir og innlendir, taka þátt í að skapa einstaka stemningu.
Vetrarhátíð lífgar upp á borgarlífið á dimmustu vetrarmánuðunum með því að tengja saman ólíka menningarlega þætti sem allir tengjast þema hátíðarinnar, ljósi og myrkri.
Boðið verður upp á fjölbreytta dagskrá í öllum sex sveitarfélögum höfuðborgarsvæðisins og ætti engum að leiðast.
Hátíðin samanstendur af þremur meginstoðum: ljósaslóð, Safnanótt og Sundlauganótt.
Ljóslistaverk mynda skemmtilega ljósaslóð á Vetrarhátíð. Á annan tug verka lýsa upp skammdegið og mynda ljósum prýdda gönguleið frá Hallgrímskirkju að Ráðhúsi Reykjavíkur.
Safnanótt verður haldin föstudagskvöldið 7. febrúar en þá opna söfn á höfuðborgarsvæðinu dyr sínar og bjóða upp á skemmtilega og fjölbreytta dagskrá.
Sundlauganótt verður haldin laugardaginn 8. febrúar í völdum laugum höfuðborgarsvæðisins. Gestir fá óvenjulega kvöldstund í mögnuðu myrkri.
Sjáumst!
Allar nánari upplýsingar um dagskrá Vetrarhátíðar má nálgast á vetrarhatid.is