Sambærilegar áskoranir Reykjavíkur og Jakobstad

Ritstjórn
Fulltrúar Reykjavíkur og Jakobstad.

Reykjavík er pöruð við borgina Jakobstad í Finnlandi í evrópsku nýsköpunarverkefni í loftslagsmálum. 

Þetta kemur til vegna þess að Reykjavík hefur fengið titilinn tilraunaborg (Pilot City) en litið er til þessara borga sem fyrirmynd annarra um að hraða ferlinu að kolefnishlutleysi með ýmiss konar nýsköpun í fjölbreyttum loftslagsverkefnum. Jakobstad telst í þessu samhengi vera tvíburaborg (Twin City) Reykjavíkur og lærir af loftslagsverkefnum borgarinnar og öfugt en áherslan í þessu samstarfi verður á samgöngur. 

Þrír fulltrúar Reykjavíkurborgar, þau Ásdís Karen Waltersdóttir, Hrönn Hrafnsdóttir og Friðrik Klingbeil Gunnarsson heimsóttu Jakobstad i í tveggja daga kynnis- og vinnuferð í nóvember. Borgirnar eru staðsettar á svipaðri breiddargráðu og glíma því við sambærilegar áskoranir, ekki síst þegar kemur að veðurfari, vetraraðstæðum og skipulagi samgangna. Þá er einnig mikil samlegð í úrgangsmálum og sjálfbærum lausnum í rekstri borganna.

Megintilgangur ferðarinnar var að dýpka tengslin enn frekar milli borganna, efla samstarfið og halda áfram gagnkvæmri þekkingaryfirfærslu innan ramma Tilraunaborgir.

Í heimsókninni fengu fulltrúar borgarinnar kynningu á staðháttum í Jakobstad, fóru í skoðunarferð um bæinn og kynntust helstu verkefnum borgarinnar, sérstaklega á sviði úrgangs- og samgöngumála. Þá var einnig farið í heimsókn til Ekorosk, sem sinnir úrgangsstjórnun á svæðinu og gegnir svipuðu hlutverki og Sorpa á höfuðborgarsvæðinu.

Deildu reynslu frá Reykjavík

Eitt af lykilatriðum ferðarinnar var miðlun á reynslu og lærdómi frá Reykjavík, meðal annars hvað varðar þróun sjálfbærra lausna í samgöngum, úrgangsstjórnun og loftslagsaðgerðum. Með samtali, kynningum og vettvangsferðum skapast gagnkvæmur skilningur á því hvað virkar vel í hvorri borg fyrir sig og hvaða lausnir megi yfirfæra milli staða.

Samstarfið heldur áfram á næsta ári þegar fulltrúar Jakobstad heimsækja Reykjavík vorið 2026. Þá verður áfram lögð áhersla á miðlun þeirrar þekkingar sem skapast í gegnum verkefnið Tilraunaborgir og frekari þróun sameiginlegra lausna í þágu sjálfbærrar borgarþróunar.