Lýðræði, gleði og samheldni einkenna frístundaheimilin Frostheima og Selið
Skóli og frístund
Í nýlegri könnun Sameykis komust frístundaheimilin Frostheimar og Selið á topp fimm lista yfir fyrirmyndarstarfsstaði borgarinnar í flokknum litlir starfsstaðir. Starfsfólk beggja frístundaheimila telur að árangurinn megi rekja til samvinnu og stuðnings sem ríkir á vinnustaðnum. Skrifstofustjóri frístundastarfs hjá Reykjavíkurborg færði starfsfólki blóm í tilefni árangursins.
Lýðræðisleg vinnubrögð og sveigjanleiki
Selið í Melaskóla er þekkt fyrir lýðræðisleg vinnubrögð þar sem starfsfólk fær tækifæri til að hafa rödd í dagskipulagi og ábendingum um það sem hægt er að bæta. Vikulegir vinnufundir eru haldnir til að stilla saman strengi. Mikil áhersla er lögð á að skapa gott andrúmsloft á vinnustaðnum, sem er lykilatriði í vinnu með börnum. Sveigjanleiki stjórnendateymisins skilar sér í miklu trausti og almennri ánægju meðal starfsfólks. Starfsmannahópurinn er einstaklega samheldinn og þakklátur fyrir frábæra samvinnu.
Hjálpast að og styðja hvort annað
Frostheimar leggja mikið upp úr því að starfsfólk leggist allt á eitt við að skapa góðan starfsanda. Starfsfólk hjálpast að við dagleg verkefni og upplifir mikinn stuðning hvert frá öðru. Stjórnendur eru aðgengilegir, hjálplegir og sanngjarnir. Gleðin er við völd í samskiptum við börnin og starfsfólkið, og starfsfólk skemmtir sér vel saman, bæði innan vinnustaðarins og utan. Starfsfólki er gefinn kostur á að nýta styrkleika sína og hæfileika í vinnunni, sem stuðlar að vellíðan í vinnunni.
