Loftslagsborgarsamningur Reykjavíkur samþykktur
Reykjavíkurborg fékk sinn fyrsta loftslagsborgarsamning samþykktan við formlega athöfn í Vilníus í Litáen í morgun. Þar fer fram loftslagsráðstefna sem Reykjavíkurborg sækir ásamt fulltrúum samtals 112 loftslagsborga sem taka þátt í Evrópusamstarfi um að verða kolefnishlutlausar og snjallar árið 2030.
Loftslagsmál risastórt samstarfsverkefni
„Reykjavík hefur nú fengið sinn loftslagsborgarsamning samþykktan og ég tók á móti svokölluðum mission label hér í dag,” segir Dóra Björt Guðjónsdóttir, borgarfulltrúi og formaður umhverfis- og skipulagsráðs Reykjavíkurborgar, sem tók formlega við viðurkenningunni í Vilníus.
„Það er mikill heiður og viðurkenning á okkar öfluga plani. Það felur líka í sér aðgang að enn sterkari stuðningi frá NetZeroCities og möguleikum á enn víðtækara samstarfi. Við hlökkum til að vinna að þessu áfram með þátttakendum og öllum sem hafa áhuga, því loftslagsmál eru jú risastórt samstarfsverkefni og það er engin önnur leið. Þetta skiptir öllu máli fyrir velferð okkar allra og framtíðarkynslóða,“ segir hún.
Þetta skiptir öllu máli fyrir velferð okkar allra og framtíðarkynslóða
Samtals 39 borgir til viðbótar fengu í dag þennan opinbera stimpil sem viðurkennir metnaðarfull markmið borganna og getur opnað leiðir að fjármagni til að styðja við takmarkið að kolefnishlutleysi. Alls hafa 92 af þessum 112 loftslagsborgum fengið samning sinn samþykktan. Allar þessar 112 borgir þurfa að gera loftslagsborgarsamning með þátttakendum sem eru til í verkefnið með þeim.
15 aðgerðir með 18 þátttakendum
Fyrsti loftslagsborgarsamningur Reykjavíkur var undirritaður 7. október 2024. Sá samningur inniheldur 15 aðgerðir með 18 þátttakendum. Þátttakendur í samningnum hafa skuldbundið sig til að móta aðgerðir sem draga mælanlega úr losun gróðurhúsalofttegunda og styðja við loftslagsmarkmið Reykjavíkurborgar um að verða kolefnishlutlaus 2030. Einnig til að taka þátt í árlegum samráðsfundum fram til ársins 2030 hið minnsta. Haldin var vinnustofa með þátttakendum á dögunum og er hún hluti af slíkri samvinnu en loftslagsborgarsamningurinn á að vera lifandi plagg og vera endurskoðaður reglulega.
Þátttakendur í samningnum er fjölbreyttur hópur; B-hlutafyrirtæki, félagasamtök og opinberir aðilar, bæði tengdir ríki og sveitarfélögum. Þau sem skrifa undir samninginn auk Reykjavíkurborgar eru umhverfis- orku og loftslagsráðuneytið, innviðaráðuneytið, Samtök sveitarfélaga á höfuðborgarsvæðinu, Landspítalinn, Háskólinn í Reykjavík, Háskóli Íslands, Íslenska gámafélagið, Sorpa, Terra, Orkuveita Reykjavíkur, Faxaflóahafnir, Veitur, Festa, Strætó, Húsnæðis- og mannvirkjastofnun, Grænni byggð, Samtök iðnaðarins og Visit Reykjavík.
Aðgengi að fjármagni og frekari ráðgjöf
Loftslagsborgarsamningurinn markar heildarsýn borganna að leið sinni að kolefnishlutleysi og inniheldur bæði fjárfestingaráætlun og aðgerðaráætlun en aðdragandinn hefur verið langur og unninn í góðri samvinnu við ráðgjafa frá NetZeroCities. Mikilvægur hluti í samningum, sem verður endurnýjaður reglulega, er að fá opinber fyrirtæki og stofnanir til liðs við sig, rétt eins og einkafyrirtæki og virkja almenna borgara um leið.
Viðurkenning loftslagsborgarsamnings Reykjavíkurborgar gerir það að verkum að borgin fær aðgang að nýjum alþjóðlegum fjármálavettvangi fyrir loftslagsborgir sem býr til tengingu við fjármagn úr einkageiranum. Loftslagsborgir fá jafnframt aðgengi að fjármagni og ráðgjöf frá Evrópska fjárfestingabankanum (EIB).