Færsla á endamarki Reykjavíkurmaraþons tekur gildi 2026
Íþróttabandalag Reykjavíkur hefur óskað eftir því við Reykjavíkurborg að fresta breytingu á endamarki Reykjavíkurmaraþons frá Lækjargötu yfir á Geirsgötu þar til í ágúst á næsta ári.
Borgarráð samþykkti á fundi sínum í desember á síðasta ári tillögur starfshóps um endurskoðun á skipulagi Menningarnætur og Reykjavíkurmaraþons um breytingar á hlaupaleiðum Reykjavíkurmaraþons og dagskrá Menningarnætur 2025.
Meginmarkmið með breytingu á endamarki maraþonsins var að tryggja öryggi gangandi vegfarenda á svæðinu eftir að hlaupi lýkur með aukinni gæslu og betri lokunum. ÍBR segir breytinguna viðamikla, vinna sé nú þegar hafin, en ekki sé mögulegt að ljúka henni fyrr en á næsta ári.
Borgarráð hefur samþykkt beiðni ÍBR og verður endamarkið því í Lækjargötu í ár líkt og fyrri ár en í Geirsgötu árið 2026.
Aðrar breytingar sem starfshópurinn lagði til, svo sem flutningur á skemmtiskokki úr Þingholtunum í Gamla Vesturbæinn og að kvölddagskrá ljúki klukkan 22:00 í stað 23:00, munu engu að síður taka gildi nú í ár.