Brunabangsinn Björnis kominn til starfa á Íslandi

Ritstjórn
Björnis stillti sér upp við Höfða ásamt aðstandendum og stuðningsaðilum Björnis verkefnisins. Róbert Reynisson
Brunabangsinn Björnis stillti sér upp við Höfða ásamt aðstandendum og stuðningsaðilum Björnis verkefnisins.

Fyrsti vinnudagur brunabangsans Björnis (Bjössa) á Íslandi var í gær. Heiða Björg Hilmisdóttir borgarstjóri og stjórnarformaður Slökkviliðs höfuðborgarsvæðisins hitti hann af því tilefni, fór með honum upp í körfubíl og sýndi honum höfuðborgina úr 40 metra hæð í blíðskaparveðri.

Björnis verkefnið hófst í Þrándheimi í Noregi og hefur síðan breiðst um allan Noreg. Verkefnið byggir á þeirri hugmyndafræði að fræðsla um eldvarnir fyrir börn sé einn af grunnstólpum eldvarnafræðslu, bæði vegna þess að börn öðlast grunnþekkingu í eldvörnum sem þau búa að alla ævi og þar sem börn eru góðir sendiherrar þegar kemur að því að fræða foreldra, ömmur og afa um eldvarnir.

Heiða Björg Hilmisdóttir borgarstjóri og brunabangsinn Björnis uppstillt fyrir utan Höfða í blíðvirði. Slökkviliðsbíll og Höfði í bakgrunni.

Vel fór á með Björnis og Heiðu Björgu Hilmisdóttur, borgarstjóra og stjórnarformanni Slökkviliðs höfuðborgarsvæðisins.

Bækur, sjónvarpsþættir, skemmtanir og leikrit

Mikill metnaður hefur verið lagður í verkefnið, en komnar eru út bækur um Björnis, gerðir hafa verið sjónvarpsþættir sem meðal annars eru sýndir á RÚV, haldnar eru skemmtanir í kringum Björnis í Noregi, auk þess sem jólaleikrit er sett upp í leikhúsum ár hvert. Þá er Björnis virkur á samfélagsmiðlum í Noregi og nær þannig til breiðari aldurshóps, meðal annars með stuttum myndböndum á TikTok. Hægt er að fara á heimasíðu Björnis fyrir ítarlegri upplýsingar.

"...börn öðlast grunnþekkingu í eldvörnum sem þau búa að alla ævi og börn eru góðir sendiherrar þegar kemur að því að fræða foreldra, ömmur og afa um eldvarnir."

Nafnið Björnis: Þegar viðræður hófust við Norðmenn um að fá Björnis til Íslands kom fljótlega í ljós að Norðmönnum þykir verulega vænt um þetta mikilvæga verkefni og nafnið Björnis. Þegar í ljós kom að þegar væri búið að þýða fyrstu seríuna af Björnis yfir á íslensku og að í þýðingunni hefði nafninu verið breytt í Bjössa brunabangsa var ákveðið að halda Björnis nafninu en að kalla mætti bangsann Bjössa.

Brunabangsinn Björnis, Heiða Björg borgarstjóri og slökkviliðsmaður í körfu körfubíls, hátt yfir Höfða. Advania í baksýn.

Björnis er ekki lofthræddur og það viðraði vel fyrir útsýnisferð í gær.

Kærleiksríkur huggunarbangsi

Auk þess að nýtast við fræðslu þá er Björnis er notaður sem verkfæri þegar slökkvilið hittir börn í tengslum við eldsvoða og önnur slys þar sem dælubíll kemur að, og er þá svokallaður huggunarbangsi. Ekki er komin tímasetning á hvenær þessi hluti verkefnisins verður innleiddur en líklega verður það á komandi mánuðum.

Við fögnum komu Björnis til Íslands og bjóðum hann velkominn til starfa.

Slökkviliðsbílar og sjúkrabíll uppstilltir við Höfða í blíðviðri þegar tekið var á móti brunabangsanum Björnis. Loftmynd.

Við erum þakklát fyrir okkar frábæru viðbragðsaðila og Björnis er kærkomin viðbót.