Vetrarþjónustan yfir hátíðirnar
Vetrarþjónustuteymi Reykjavíkurborgar starfar eins og alltaf yfir alla jólahátíðina og mun einblína á að halda samgöngukerfinu greiðfæru eftir aðstæðum enda margir á ferðinni. Verkefnin á þessum Þorláksmessudegi hafa falist í því að hreinsa frá niðurföllum svo vatn komist sína leið eftir vatnsveðrið undanfarinn sólarhring. Einnig verður sérstök gát höfð á miðborginni í kvöld, Þorláksmessu, til að fyrirbyggja hálku.
Veðurspá: Suðvestanátt með éljagangi
Veðurhorfur yfir hátíðirnar bjóða upp á suðvestanátt með éljagangi – dæmigerðum útsynning. Snjósöfnun getur átt sér stað í slíkum aðstæðum.
Við hvetjum borgarbúa til að fylgjast vel með veðurspám og fara varlega í jólaumferðinni.