Er samfélagið okkur öllum aðgengilegt?
Fjallað var um fjölmenningu á mannmörgu velferðarkaffi sem haldið var í samfélagshúsinu á Vitatorgi í morgun. Þar komu fram einstaklingar sem allir vinna að því á einn eða annan hátt að auka samskipti milli ólíkra mál- og menningarhópa í Reykjavík og stuðla að því að samfélagið sé öllu fólki aðgengilegt, hvort sem það er fætt og uppalið hér á landi eða ekki.
Þau Iryna Hordiienko, verkefnafulltrúi hjá Rauða krossinum og Jóhannes Guðlaugsson, verkefnisstjóri í Suðurmiðstöð, sögðu frá sendiherraverkefninu sem varð til í Breiðholti fyrir þremur árum. Í upphafi tóku fimm mál- og menningarsamfélög þátt í verkefninu en í hópnum eru í dag 25 einstaklingar. Allir gegna sendiherrarnir mikilvægu hlutverki við að miðla upplýsingum og byggja upp traust á milli ólíkra hópa. Þau Jóhannes og Iryna vörpuðu fram þeirri spurningu hvort íslenskt samfélag sé öllum aðgengilegt og lögðu áherslu á að fara þurfi fjölbreyttar leiðir til að svo geti verið. Þau sögðu sendiherrana nýta ýmsar leiðir til að taka við upplýsingum sem þeir miðla áfram, þeir spyrji spurninga og svari spurningum og veiti ýmiss konar ráðgjöf við að leysa fjölbreytt verkefni.
Fyrir allar fjölskyldur af erlendum uppruna sem flytja til Reykjavíkur
Sigríður Arndís Jóhannsdóttir, verkefnastjóri á velferðarsviði, var næst á dagskrá en hún sagði frá móttökuverkefninu Velkomin í hverfið þitt sem er í innleiðingu í öllum hverfum Reykjavíkur. Í gegnum verkefnið er lögð áhersla á heildræna nálgun við móttöku nýrra fjölskyldna með börn á leik- og grunnskólaaldri. Öllum fjölskyldum sem flytja til borgarinnar bjóðast að minnsta kosti tvö viðtöl, móttökuviðtal sem haldið er í skólanum og samfélagsviðtal sem fer fram í samfélagshúsi eða félagsmiðstöð hverfisins. Þau sem þörf hafa á fái fleiri viðtöl. Sérstaklega er hugað að fjölskyldum í viðkvæmmri stöðu og lögð áhersla á að verkefnið taki utan um alla fjölskyldumeðlimi. Í lok erindis Sigríðar Arndísar var sýnt myndband þar sem Fazal Omar, leigubílstjóri og túlkur, sagði frá reynslu sinni af Velkomin-verkefninu.
Íþróttaiðkun lykillinn að samfélaginu
Í máli Sigríðar Arndísar kom einnig fram að unnið sé hörðum höndum að því að auka virkni og íþróttaþátttöku barna. Birta Björnsdóttir, mannréttinda- og fræðslustjóri Íþróttabandalags Reykjavíkur (ÍBR), fjallaði einmitt um mikilvægi þess í sínu erindi, þar sem hún sagð frá hlutverki starfshóps í fjölmenningarfræðslu, sem hefur meðal annars það hlutverk að vinna tillögur um fjölmenningarfræðslu fyrir íþrótta- og tómstundastarf í Reykjavík. Hún sagði frá því sem starfshópurinn hefur áorkað og jafnframt frá mikilvægum verkefnum sem eru framundan. Meðal annars sé unnið að því að útbúa orða- og setningalista fyrir íþróttir á fjölda tungumála, að því að koma fjölmenningu inní í þjálfaramenntun ÍSÍ, verið sé að útbúa upplýsingar um áætlaðan kostnað við að æfa mismunandi íþróttir og þá vinni þau jafnframt að því að búa til fjölmenningar- og inngildingarfræðslu fyrir iðkendur.
Um 1200 starfsmenn Reykjavíkurborgar af erlendum uppruna
Hjá Reykjavíkurborg starfa 1200 starfsmenn sem eru af erlendum uppruna og þeir sinna afar ólíkum og fjölbreyttum störfum. Þrír þeirra, þau Anna Maria, Mazen Marouf og Esther Ndiyoi Imbula sögðu frá lífi sínu og starfi í Reykjavík í formi myndbands á fundinum í dag. Þar var jafnframt fjallað um íslenskukennslu á starfsstöðum Reykjavíkurborgar en það er stefna borgarinnar að leggja áherslu á íslenskukennslu. Guðrún Inga Tómasdóttir, mannauðssérfræðingur á mannauðs- og starfsumhverfissviði Reykjavíkurborgar, sagði frá þeim leiðum sem farnar eru til að vinna að því markmiði. Íslenska sé kennd inná sumum vinnustöðum borgarinnar, í boði sé smáforritið „Bara tala“, og auk þess eigi borgin í samstarfi við nokkra tungumálaskóla, bæði um kennslu inná vinnustöðum auk þess að starfsfólki bjóðist að fara á almenn íslenskunámskeið hjá þeim á kostnað Reykjavíkurborgar. Guðrún Inga sagði að í heild leggi um fjórðungur starfsfólks Reykjavíkurborgar sem er af erlendum uppruna stund á einhvers konar íslenskunám. Enn sé því langt í land, þar sem markmið borgarinnar sé að 50% starfsfólks leggi stund á íslenskunám og mikill vilji sé til þess að hækka það hlutfall.
Velferðarkaffi er opinn fundur velferðarráðs Reykjavíkurborgar en að þessu sinni var það haldið með fjölmenningarráði. Hlutverk þess ráðs er að vera borgarstjórn, nefndum og ráðum Reykjavíkurborgar til ráðgjafar um málefni og hagsmuni borgarbúa sem eru innflytjendur.
Fundinum var streymt í gegnum Facebook-síðu velferðarsviðs og verður áfram aðgengilegt þar.