Veira nemur land – Ítarleg skýrsla um áhrif COVID-19 á Reykjavíkurborg
Veira nemur land, skýrsla um áhrif COVID-19 á starfsemi Reykjavíkurborgar, var lögð fram á fundi borgarráðs í morgun. Í skýrslunni er farið ítarlega yfir viðbrögð Reykjavíkurborgar við heimsfaraldrinum. Þar er einnig að finna áhugaverð viðtöl við stjórnendur og framlínustarfsfólk sem stóð í eldlínunni þegar sóttvarnir og samkomubönn voru daglegt brauð.
Samhæfð vinnubrögð skiptu sköpum
Í skýrslunni kemur m.a. fram að samhæfð vinnubrögð allra aðila þegar heimsfaraldurinn COVID-19 geisaði hér á landi frá ársbyrjun 2020 og til næstu tveggja ára hafi skipt sköpum. Dagur B. Eggertsson, borgarstjóri, segir þetta hafa gert gæfumuninn. „Ein helsta niðurstaða skýrslunnar er sú að styrkurinn í vel heppnuðum aðgerðum Reykjavíkurborgar í faraldrinum fólst í því að notastð var skipulag sem búið var að móta og þjálfa upp síðastliðin ár á höfuðborgarsvæðinu og byggði því á traustum grunni, þ.e. almannavarnanefnd og framkvæmdaráði almannavarnanefndar, neyðarstjórnum sveitarfélaganna sem og starfsfólki almannavarnanefndar.“
Hugsað í lausnum
Einn helsti styrkleiki stjórnkerfisins hjá Reykjavíkurborg var geta og vilji til að bregðast við með snörpum hætti og hugsa í lausnum, þvert á svið og einingar þegar kom að sóttvörnum og innra skipulagi. Lykilatriði var að halda þeirri þjónustu gangandi sem leyfilegt var með öllum tiltækum ráðum. Það gekk eftir en vegferðin var mikil áskorun fyrir allt höfuðborgarsvæðið sem vann þétt saman og bar starfsfólk almannavarnanefndar meginábyrgð á samhæfingu sveitarfélaganna.
Reykjavíkurborg leiðandi á landsvísu
Þá er það dregið fram að starfsfólk borgarinnar var leiðandi á landsvísu og deildi öllu því efni og úrlausnum sem sneri að velferðarþjónustu, skóla- og frístundamálum, ýmsa tækni sem þurfti að grípa til, menningar- og íþróttamálum, upplýsingamiðlun á mörgum tungumálum jafnt innan kerfis sem utan, höfuðborgarsvæðisins og landsins alls og margt fleira.
Neyðarstjórn Reykjavíkurborgar fundaði nær daglega til að samræma aðgerðir og auka upplýsingaflæði. Leiðbeiningar, tilmæli og reglur voru gefnar út af Reykjavíkurborg til stjórnenda, starfsfólks og þjónustunotenda.
Sérstök áhersla lögð á að vernda viðkvæma hópa
Viðbúnaðurinn miðaði allur að því að vernda borgarbúa fyrir smitum með því að draga úr útbreiðslu kórónuveirunnar. Sérstök áhersla var lögð á að vernda viðkvæma hópa. Þá þurfti einnig að huga að sóttvörnum fyrir starfsfólk borgarinnar svo hægt væri að halda þjónustu órofinni. Grunn- og leikskólum var haldið opnum með markvissum aðgerðum og var það talið mjög mikilvægt að skerða ekki þá þjónustu.
Lögð var rík áhersla á að fylgja tilmælum og leiðbeiningum sóttvarnalæknis og almannavarna út í ystu æsar og koma skilaboðum frá þeim á framfæri á öllum tiltækum miðlum Reykjavíkurborgar; bæði vef borgarinnar, innri vef og samfélagsmiðlum.
Stuttar boðleiðir mikilvægar
Fulltrúar almannavarna tiltaka einnig í skýrslunni að beint aðgengi að æðstu embættismönnum borgarinnar og ekki síst borgarstjóra hafi verið lykilatriði í því að upplýsingagjöf og aðgerðir til sóttvarna hafa tekist jafn vel og raun bar vitni. Boðleiðir á milli æðstu stjórnenda voru stuttar og alltaf hægt að ná í fólk ef nauðsyn bar til.
Bjarni Brynjólfsson fyrrverandi upplýsingafulltrúi er aðalhöfundur COVID-19 skýrslu Reykjavíkurborgar. Einnig kom fleira starfsfólk borgarinnar að gerð skýrslunnar með skrifum, yfirlestri og ábendingum. Skýrslan er 542 blaðsíður.