Sigrún Árnadóttir, framkvæmdastjóri Félagsbústaða, Dagur B. Eggertsson, borgarstjóri og væntanlegir íbúar Sólveig Ragnarsdóttir, Aníta Sól Sveinsdóttir, Garðar Reynisson og Björn Eggert Gústafsson tóku í dag fyrstu skóflustungu að byggingu sex íbúða húss við Brekknaás 6.
Bygging hússins er liður í uppbyggingaráætlun Reykjavíkurborgar fyrir fatlað fólk.
Hannað með tilliti til þarfa væntanlegra íbúa hússins
Húsið og umhverfi þess er hannað með tilliti til þarfa væntanlegra íbúa hússins og er ætlað að auka lífsgæði þeirra til muna. Þessi hópur fólks hefur sértækar þarfir og þarf stuðning til daglegra athafna. Við hönnun íbúðakjarnans var ítarleg þarfagreining unnin í samstarfi við vinnuhóp fagaðila, með aðkomu aðstandenda. Þarfagreiningin lá til grundvallar ákvörðunum hvað varðar efnisval, hljóðvist, stýringu dagsbirtu, læsileika o.fl. og við hönnunina voru þróaðar ýmsar sértækar lausnir.
Áherslur innan fötlunarfræðinnar eru í stöðugri þróun og í hönnun íbúðarkjarnans og lóðarinnar er leitast við að mæta þessari þróun. Húsið verður 640 m2 á einni hæð og auk íbúða verður góð aðstaða fyrir starfsfólk. Áætluð byggingarlok eru í nóvember 2024.
- Teiknistofan Stika og Birta Fróðadóttir arkitekt hönnuðu húsið.
- Lóðahönnun er í umsjón Landmótunar.
- Hnit verkfræðistofa sá um hönnun burðarþols, lagna og raflagna.
- E. Sigurðsson ehf. sér um byggingu hússins.
- VSB framkvæmdir ehf. annast byggingastjórn og byggingaeftirlit.
Það var mikil gleði við fyrstu skóflustunguna í dag og hér má sjá Sigrúnu Árnadóttur spjalla við Björn Eggert Gústafsson sem verður einn af íbúum hússins.
Félagsbústaðir hafa á undanförnum árum byggt eða keypt 17 nýja íbúðakjarna fyrir fatlað fólk víðs vegar um borgina sem eiga það sammerkt að vera byggðir með hliðsjón af áætlunum velferðarsviðs Reykjavíkurborgar í uppbyggingu húsnæðis fyrir fatlað fólk. Félagsbústaðir sem eru í eigu Reykjavíkurborgar eru eitt stærsta leigufélag landsins með tæplega 3.100 félagslegar leiguíbúðir í höfuðborginni.