Reykjavík skorar hátt í árlegum lesendaverðlaunum hins virta ferðatímarits Condé Nast Traveller, sem tilkynnt voru nýlega. Þar kemst Reykjavík á lista yfir áhugaverðustu smáborgir heims og augljóst er að áhugi ferðalanga á að heimsækja borgina er mikill.
Condé Nast Traveller hefur verið gefið út frá árinu 1987 og nýtur mikilla vinsælda. Árlega veitir tímaritið lesendaverðlaun sem eru meðal þeirra virtustu í ferðageiranum. Þar setjast lesendur í dómarasætin og kjósa meðal annars bestu flugfélögin, hótelin og áfangastaðina. Að þessu sinni tóku yfir átta hundruð þúsund manns þátt í kosningunni og lenti Reykjavík í áttunda sæti listans yfir áhugaverðustu smáborgirnar.
Í efsta sæti listans trónir San Miguel de Allende í Mexíkó en þar á eftir fylgdu San Sebastián á Spáni, Salzburg í Austurríki og Siena á Ítalíu. Kosningin í ár var óhefðbundin að því leyti að ferðalög lágu að mestu niðri vegna COVID-19 faraldursins og þykir kosningin því endurspegla hvaða staði ferðalanga dreymdi helst um að heimsækja á meðan ekki var hægt að ferðast.
Það er um að gera að skoða topp tíu listann og láta sig dreyma um ferðalög til framandi staða:
- San Miguel de Allende, Mexíkó.
- San Sebastián, Spánn.
- Salzburg, Austurríki.
- Siena, Ítalía.
- Dubrovnik, Króatía.
- Brugge, Belgía.
- Cambridge, Bretland.
- Reykjavík, Ísland.
- Galway, Írland.
- Kralendijk, Bonaire.