Helgina 6. - 7. febrúar verður stofnuð ný hljómsveit í Eldborgarsal Hörpu. Hljómsveitin er ólík nokkurri annarri hljómsveit sem hingað til hefur staðið á sviði Eldborgar.
Um er að ræða nýtt samstarfsverkefni starfsendurhæfingarstöðva, Hugarafls, Listaháskóla Íslands, Sinfóníuhljómsveitar Íslands, Hörpu og Tónlistarborgarinnar Reykjavíkur en verkefnið er runnið undan rifjum MetamorPhonics, samfélagsmiðuðu fyrirtæki sem Sigrún Sævarsdóttir-Griffiths, tónlistarkona stýrir í London.
Helgina 6.-7. febrúar verður stofnuð ný hljómsveit í Eldborgarsal Hörpu. Hljómsveitin er ólík nokkurri annarri hljómsveit sem hingað til hefur staðið á sviði Eldborgar, en meðlimir koma víðsvegar að úr íslensku samfélagi, eða frá Starfsendurhæfingu Hafnarfjarðar, Starfsendurhæfingu Vesturlands, Samvinnu á Suðurnesjum, Hugarafli, Listaháskóla Íslands og Sinfóníuhljómsveit Íslands. Aðrir samstarfsaðilar verkefnisins eru Tónlistarborgin Reykjavík og Harpa tónlistar- og ráðstefnuhús.
Samsetning hljómsveitarinnar er ekki það eina sem gerir hana óhefðbundna, heldur mun þessi 35 manna hljómsveit, í sameiningu, semja alla sína tónlist og flytja á lokatónleikum verkefnisins þann 21. maí 2021 í Norðurljósasal Hörpu.
Hugmyndafræði MetamorPhonics sem leiðir verkefnið byggir á því, að til þess að fólki vegni vel í lífinu, þurfi það að upplifa sig sem gjaldgenga, virka meðlimi samfélagsins og að á það sé hlustað. Því skapar MetamorPhonics einstakan, opinn og aðgengilegan vettvang til tónsköpunar, fyrir tónlistarnemendur á háskólastigi og fólk sem stendur á krossgötum í lífinu sem er að byggja sig upp eftir margskonar áföll, t.d. heimilisleysi, atvinnuleysi eða kulnun. MetamorPhonics rekur hljómsveitir í London, Leicester, Los Angeles og nú á Íslandi.
Stutt heimildarmynd um hljómsveitina The Messengers í London
Tónlistarmaðurinn Brian Eno hefur fylgst með verkefninu í Bretlandi:
„Fabulous idea! Experiments like this – sociomusical experiments – are the future of both music and society. What we really need now is to reverse the process of atomisation – the separation of people from each other – that has been pushing us further and further apart for the last 40 years. The conception of society as a random grouping of self-interested individuals has got us into the mess we're in now. We need ways of coming together again. This approach to collaborative art is the way to do that."
-Brian Eno, 21. febrúar 2019