„Allar fyrirmyndir okkar í heiminum hafa iðandi mannlíf og þarna sjáum við tilvalið tækifæri til að skapa aukið mannlíf í Reykjavík,“ segir Pétur Andreas Maack borgarhönnuður. Þar á hann við verkefni þar sem borgin hefur veitt ýmsum rekstraraðilum afnot af útisvæðum við húsnæði þeirra, til að færa aukið líf í borgarlandið og hvetja fólk til að njóta sín utandyra.
Verkefnið hefur verið í gangi í tvö ár og hefur Pétur haldið utan um það ásamt Salóme Þorkelsdóttur. „Við höfum unnið að því með rekstraraðilum að fá þá til að vera sýnilegri og teygja sig út í borgarlandið,“ segir Pétur. „Það gerum við með því að veita til dæmis eigendum veitingastaða og kaffihúsa svæðið fyrir utan reksturinn til afnota. Þessir rekstraraðilar geta þá búið til notaleg útisvæði og jafnvel dekkað upp borð og fengið þannig stærra svæði fyrir sinn veitingarekstur. Þetta ýtir auðvitað undir sölu á stöðunum en það sem borgin græðir á þessu er aukið mannlíf. Við viljum hafa borgina okkar lifandi.“
Markmiðið rímar vel við verkefnið Torg í biðstöðu. Þema þess í ár var hvílustæði, sem er íslenskt nýyrði yfir enska orðið parklet, sem er samsett úr orðunum parking og outlet. Höfundur íslenska orðsins er Edda Ívarsdóttir og segir Pétur markmiðið að koma orðinu hvílustæði í almenna notkun.
Allir mega nota aðstöðuna
21 hvílustæði hafa verið í notkun í borginni í sumar. „Þetta eru 35 bílastæði sem hafa verið lögð undir fólk í stað bíla,“ segir Pétur. Í mörgum stæðanna hafa verið byggðir pallar með borðum og stólum og víða hefur verið lagt gervigras. Þá hafa sumir skapað aðstöðu fyrir hjólreiðafólk til að geyma hjól sín í stæðunum, en markmiðið er alltaf það sama, þ.e. að fólk vilji nýta svæðin til að hafa það gott. „Þetta er meira en tvöföldun frá því í fyrra. Eigendur veitingastaða og aðrir rekstraraðilar eru að vakna til lífsins. Þeir sjá nágranna sína byggja upp flott útisvæði, sem iða af fólki og vilja vera með, sem er frábært.“
Allir rekstraraðilar í borginni geta sótt um að vera með í verkefninu. Nú í sumar gilda afnotaleyfi útisvæðanna til fyrsta október, en Pétur segir að virki verkefnin vel sé sjálfsagt að leyfa þeim að standa áfram yfir veturinn. Dæmi um rekstraraðila sem hafa tekið þátt og skapað skemmtileg útisvæði eru Salka Valka á Skólavörðustíg, Fish and chips á Frakkastíg, Kaktus Espressobar við Vitastíg og blómabúðin Barónessan, við Barónsstíg. „Það eru því ekki bara veitingaaðilar sem fá þessi afnot af borgarlandinu heldur einnig verslanir,“ bendir Pétur á. „En við minnum líka alltaf á að þessi svæði eru almannaeign og þau mega allir nýta. Allir mega fá sér sæti og njóta þessara svæða þótt ekkert sé keypt. Borgin á þetta land en rekstraraðilar fá þessi afnot.“
Prýði fyrir nágrennið
„Mér finnst þetta alveg yndislegt, að ganga um miðborgina og sjá allt þetta líf,“ segir Guðmundur Aðalsteinn Þorvarðarson, eigandi Barónessunnar. „Ég get bara talað fyrir mína verslun en ég finn mikla og almenna ánægju með þetta. Fólk segir að þetta lyfti upp götunni og sé prýði fyrir allt nágrennið.“
Hvílustæðin fækka vissulega bílastæðum. Guðmundur varð örlítið var við óánægju vegna þess í fyrra en kveðst engar kvartanir hafa heyrt í ár. „Ekki eina einustu,“ ítrekar hann og brosir breitt.
Hann vill gjarnan að verkefnið haldi áfram. „Ég sé mikla möguleika í vetrarborg líka. Það er lítil snjókoma á þessu svæði og allt fýkur burt í norðan- og sunnanáttinni,“ segir hann. „Ég er að fara inn í haustið núna með haustkransa og síðan koma jólatrén og fleira. Ég yrði mjög þakklátur ef þetta verkefni yrði stækkað því við búum á landi sem leyfir okkur að vera með blóm úti allt árið. Hér er engin árstíð þar sem ekkert vex; blómin elska þessar 15 gráður okkar,“ segir hann hlæjandi að lokum.