Borgarstjórinn í Reykjavík býður til kynningar um framtíðaruppbyggingu húsnæðis í borginni. Borgin mun vaxa og íbúum og störfum fjölga en á sama tíma þarf útblástur að dragast saman. Það er áskorun sem krefst nýrrar nálgunar. Á fundinum verður farið yfir mörg þeirra verkefna í Reykjavík sem styðja við framtíðarsýn Græna Plansins um að draga úr losun gróðurhúsalofttegunda og skapa öruggt húsnæði á viðráðanlegu verði fyrir alla.
Kynningin verður haldin í Tjarnarsal Ráðhúss Reykjavíkurborgar og verður einnig send út beint á vef Reykjavíkurborgar.
Dagskrá:
- Grænt húsnæði framtíðarinnar
Dagur B. Eggertsson borgarstjóri
- Hagkvæmt húsnæði í Reykjavík
Fulltrúar verkefnahópa kynna framvindu verkefna- Gufunes – Þorpið vistfélag – Runólfur Ágústsson, þróunar- og verkefnastjóri Þorpsins og Sólveig Berg, arkitekt hjá Yrki
- Gufunes – Hoffell – Jóhann Einar Jónsson, arkitekt hjá Teiknistofu arkitekta
- Úlfarsárdalur – Urðarsel – Gísli Örn Bjarnhéðinsson, framkvæmdastjóri Urðarsels
- Reinventing Cities - Grænar þróunarlóðir
- Niðurstöður dómnefndar
- Kynning á vinningstillögum
Fundarstjóri er Líf Magneudóttir, formaður umhverfis- og heilbrigðisráðs.
Áskorunum í umhverfis- og húsnæðismálum svarað með skapandi grænum lausnum
Húsnæðismál eru eitt mikilvægasta verkefni samtímans. Byggingariðnaðurinn keppist við að svara mikilli íbúðaþörf en skilur um leið eftir sig djúpt kolefnisfótspor. Þessum áskorunum þarf að svara með sérstakri áherslu á skapandi grænar lausnir. Til framtíðar viljum við sjá grænt borgarumhverfi, sem býður upp á grænan lífsstíl í samgöngum, borgarbúskap/matjurtarækt, endurvinnslu og sorplausnum, blágrænum ofanvatnslausnum, svo dæmi séu tekin.
Leitað að hugmyndum um húsnæði framtíðar með léttu vistspori
Reykjavíkurborg auglýsti þann 6. maí eftir skapandi hugmyndum að íbúðarhúsnæði framtíðarinnar með áherslu á grænar lausnir. Öllum velkomið að senda inn hugmynd fyrir 26. maí nk., hvort sem um er að ræða nýja hugmyndafræði, nýja byggingaraðferð eða blöndu aðferða. Borgin hyggst leggja til spennandi þróunarreiti á Veðurstofureit, við Arnarbakka, Völvufell, Suðurfell og Suðurlandsbraut og hvetja þannig til vistvænnar uppbyggingar. Sjá nánar um hugmyndaleitina á vef Reykjavíkurborgar.
Reinventing Cities - Grænar þróunarlóðir
Á undanförnum árum hefur Reykjavíkurborg unnið að nýjum lausnum í húsnæðismálum. Þetta hefur m.a. verið gert með þátttöku í alþjóðlegri samkeppni á vegum samtakanna C40 undir merkjum Reinventing Cities þar sem lykilreitir í borginni eru þróaðir samkvæmt lausnum á sviði sjálfbærni, umhverfisgæða og lægra kolefnisfótspors. Yfirstandandi samkeppni er sú önnur í röðinni en í henni bauð Reykjavíkurborg fram tvær þróunarlóðir, Gufunesbryggju og Sævarhöfða 31. Keppnin snýst um að þverfagleg teymi móti framtíðarsýn fyrir lóðirnar með það að meginmarkmiði að þar rísi fyrirmyndarbyggingar í sjálfbærni. Á fundinum mun borgarstjóri tilkynna niðurstöður dómnefndar og sigurvegarar kynna sínar tillögur. Þá mun borgarstjóri fjalla almennt um samkeppnina, m.a. um nýjustu viðbótina Students Reinventing Cities. Sjá nánar um samkeppnina hér.
Hagkvæmt húsnæði fyrir ungt fólk og fyrstu kaupendur
Hagkvæmt húsnæði fyrir ungt fólk og fyrstu kaupendur er verkefni sem hefur verið í gangi um nokkurt skeið og borgin hefur lagt fram valin svæði fyrir þessa uppbyggingu. Borgin tryggir hag kaupenda því lóðaúthlutun er bundin skilyrðum til að ágóði lóðaúthlutunar skili sér til kaupendanna, ungs fólks og fyrstu kaupenda. Kvöðum er þinglýst til að renna skorðum fyrir að íbúðir hækki í verði umfram vísitölu. Sjá nánar á upplýsingasíðu um Hagkvæmt húsnæði.
Verið er að þróa og byggja íbúðir á níu reitum víðsvegar um borgina og fáum við innsýn inn í þrjú þeirra, tvö verkefni í Gufunesi og eitt í Úlfarsárdal.