Ekki þarf lengur að nota grímur á starfsstöðum velferðarsviðs, þegar hægt er að virða tveggja metra reglu. Fólk sem sækir mötuneyti eða hópastarf getur verið grímulaust með einn metra sín á milli, að því gefnu að það sitji í fyrirfram bókuðum sætum. Enn gildir grímuskylda hjá starfsfólki þegar veitt er aðstoð sem krefst meiri nálægðar en tveggja metra. Bólusetning starfsfólks eða notenda þjónustu kemur ekki í veg fyrir grímuskyldu.
Með nýrri reglugerð sem tók gildi í dag, 25. maí, eru fjöldatakmarkanir í hverju rými færðar úr 50 manns í 150. Á öllum vinnustöðum og í annarri starfsemi þarf að tryggja að tveggja metra reglunni sé fylgt.
Reglurnar sem nú gilda á velferðarsviði, þar á meðal í öllu starfi með eldri borgurum og í málaflokki fatlaðs fólk, eru eftirfarandi:
- Allt að 150 manns mega koma saman í rými ef hægt er að halda almennar nálægðartakmarkanir.
- Halda þarf tveimur metrum á milli þeirra sem ekki eru í nánum tengslum.
- Þeim sem eru í nánum tengslum er heimilt að hafa einn metra sín á milli.
- Þegar ótengdir aðilar sitja saman í mötuneytum og hópastarfi á félagsmiðstöðvum mega þeir hafa einn metra sína á milli, að því gefnu að þeir sitji í bókuðum sætum.
- Grímuskylda er þar sem ekki er unnt að tryggja tveggja metra nálægðarmörk milli einstaklinga sem ekki eru í nánum tengslum.
- Starfsfólk notar grímur við umönnun, svo sem þegar aðstoðað er við athafnir við daglegt líf, þegar ekki er hægt að tryggja 2 metra nálægðarmörk.
Félagsstarf opið á ný fyrir gesti og gangandi
Rýmkun á fjöldatakmörkunum hefur talsverð áhrif á starf eldra fólks í borginni, þar sem ýmsar takmarkanir hafa verið í gildi til að hefta útbreiðslu Covid-19. Matarþjónusta og hópastarf hefur verið opið með takmörkunum. Nú hefur þeim takmörkunum verið aflétt að miklu leyti. Matarþjónusta og félagsstarf í félagsmiðstöðvum þar sem þjónustuíbúðir eru til húsa er nú að nýju opið fyrir gesti og gangandi.
Eftirfarandi reglur gilda nú í starfi félagsmiðstöðva velferðarsviðs, til viðbótar við þær almennu sem taldar voru upp hér að ofan:
- Í mötuneytum þarf að skrá alla matargesti fyrirfram með nafni, kennitölu og símanúmeri. Gestir eru skráðir á ákveðin borð.
- Nauðsynlegt er að gestir skrái sig með nafni, kennitölu og símanúmeri í alla viðburði.
- Starfsfólki og gestum sem kjósa að nota grímur er frjálst að gera það áfram.
- Starfsfólk notar grímur þegar matur er settur á diska.
- Gestir skenki sér sjálfir kaffi og gæti vel að persónulegum sóttvörnum.
Áfram þarf að gæta vel að persónubundnum sóttvörnum. Mikilvægt er að gestir hafi í huga að þeir mega ekki koma í heimsókn ef þeir:
- eru í sóttkví.
- eru í einangrun (einnig meðan beðið er niðurstöðu úr sýnatöku).
- hafa verið í einangrun vegna COVID-19 smits og ekki eru liðnir 14 dagar frá útskrift.
- eru með einkenni á borð við kvef, hósta, hita, höfuðverk, beinverki, þreytu, kviðverki og niðurgang.
Velferðarsvið hefur óskað eftir nánari leiðbeiningum frá Almannavörnum höfuðborgarsvæðisins, fyrir þá einstaklinga sem þegar hafa verið bólusettir gegn Covid-19. Þeim upplýsingum verður miðlað áfram um leið og þær berast. Sem stendur kemur bólusetning starfsfólks eða notenda þjónustu ekki í veg fyrir grímuskyldu.