Verkefnið Fuglafár, hugarsmíð Birgittu Steingrímsdóttur, líffræðinema við HÍ, og Heiðdísar Ingu Hilmarsdóttur, vöruhönnunarnema við LHÍ, byggir á könnun sem gerð var meðal 4. bekkinga í Reykjavík.
Fjögur verkefni sem unnin voru á vegum Nýsköpunarsjóðs námsmanna voru tilnefnd til nýsköpunarverðlauna forseta Íslands þar af tvö sem unnin voru í samstarfi við Reykjavíkurborg.
Verðlaunaverkefnið Fuglafár er spil sem miðar að því að efla í gegnum leik þekkingu barna á fuglum. Höfundar þess gerðu í fyrrasumar könnun meðal 400 grunnskólanema þar sem athugað var hvort þeir þekktu algengustu og mest einkennandi fugla í náttúru Íslands. Einnig voru kennsluhættir í fuglafræði skoðaðir. Spilið hefur verið í prófun í grunnskólum í vetur og fengið góðar undirtektir. Næstu skref eru að hefja framleiðslu og munu umsagnir kennara og nemenda nýtast til betrumbóta svo að spilið verði að enn betra kennslutæki. Umsjónarmenn verkefnisins voru þau Gunnar Þór Hallgrímsson, dósent í dýrafræði við Líf- og umhverfisvísindadeild Háskóla Íslands, Kristrún Thors, sjálfstætt starfandi vöruhönnuður og stundakennari við Listaháskóla Íslands, og Valgerður Þórisdóttir, grunnskólakennari í Selásskóla.
Hitt nýsköpunarverkefnið sem tilnefnd var til nýsköpunarverðlauna forsetans heitir Náttúrutúlkun á grænum svæðum í Reykjavík: Stöðumat og nýjar lausnir fyrir ferðamenn og íbúa var unnið af Shaunu Laurel Jones og Guðbjörgu Runólfsdóttur, meistaranemum í umhverfis- og auðlindafræði við Háskóla Íslands. Í því var stuðst við fyrirbærafræði og skapandi hugsun til að þróa nýjar nálganir til að auka umhverfisvitund notenda grænna svæða, fá fleiri til að nota rýmin og auka skilning borgarbúa og gesta á mikilvægi svæðanna. Auk fræðilegra skrifa um hvernig náttúrutúlkun gæti verið háttað var hannað skema til að meta hvers konar náttúrutúlkun var til staðar.
Ítarlegt stöðumat var unnið fyrir fjögur svæði innan Reykjavíkur: Laugarnes, Rauðhóla, Ægisíðu og skógarbút í Breiðholti. Fyrir hvert svæði var þróuð ný hugmynd að náttúrutúlkun, sem var sérsniðin að hverju svæði, með tilliti til staðhátta, notendahópa og tækifæra til hughrifa. Innan sveitarfélaga og borgarrýma eru fjölmörg tækifæri til að takast á við stærsta umhverfismál samtímans, loftslagsbreytingar. Eitt þessara tækifæra felst í auknum tengslum borgarbúa við náttúruna og umhverfið sem hefur jákvæð áhrif á almenna vellíðan og eykur umhverfisvitund.
Verkefnið var unnið í samvinnu við Reykjavíkurborg. Leiðbeinendur voru Katrín Anna Lund, dósent í ferðamálafræði við Líf- og umhverfisvísindadeild Háskóla Íslands, og Snorri Sigurðsson, líffræðingur við Umhverfis- og skipulagssviði Reykjavíkur.