Umhverfis- og skipulagssvið Reykjavíkurborgar spurði um sumargötur, ferðavenjur og útivistarsvæði í könnun sem Gallup gerði í lok ársins 2015.
Sumargötur í miðborginni á vegum Reykjavíkurborgar mælast sérlega vel fyrir því 74% svarenda voru jákvæðir en aðeins 13% neikvæðir þegar spurt var: „Ert þú jákvæð(ur) eða neikvæð(ur) gagnvart göngugötum/sumargötum í miðborg Reykjavíkur á sumrin?" Niðurstöðurnar eru svipaðar og árið 2014 en þá reyndust 76% svarenda jákvæðir og 15% neikvæðir.“ Ekki er marktækur munur á þessum könnunum.
Þetta kemur fram í netkönnun sem framkvæmd var af Gallup fyrir umhverfis- og skipulagssvið Reykjavíkurborgar og fór hún fram daganna 18. nóvember til 7. desember 2015. Í úrtakinu voru 1073 Reykvíkingar 18 ára og eldri, þátttökuhlutfall var 61%. Þrjár aðrar spurningar voru í þessari könnun, ein var um heimsóknir á útivistarsvæði og tvær um ferðavenjur af heimili til og frá skóla.
Sumargötur blífa
Reykjavíkurborg hefur breytt nokkrum götum í göngugötur á sumrin, hluta af Laugavegi, Bankastræti og Skólavörðustíg svo dæmi séu tekin. Það er gert til að auðga þátt mannlífs og skapa góða stemningu á götunum án bílaumferðar. Þessi aðgerð virðist falla fólki vel í geð því í öllum könnunum sem gerðar hafa verið hafa sumargötur fengið gott fylgi. Um 77% kvenna voru jákvæðar í þessari könnun og 71% karla en marktækur munur er á milli kynja um þetta efni.
Flestir sækja Laugardalinn heim
„Hefur þú heimsótt neðangreind útivistarsvæði Reykjavíkurborgar á sl. 12 mánuðum?“ var ein af spurningunum en spurt hefur verið að þessu undanfarin ár og röðin verið keimlík milli mælinga. Laugardalur, Tjörnin og Elliðaárdalur eru fjölsóttustu staðirnir og á eftir þeim raðast Nauthólsvík, Öskjuhlíð, Klambratún og Fossvogsdalur. Þó lítur út fyrir að færri hafi heimsótt þessi opnu svæði heldur en árið á undan, þannig sögðust 67% aðspurðra hafa heimsótt Laugardalinn árið 2015 en árið á undan voru það 73%. Ef til vill hefur veðrið árið 2015 átt þátt í þessu.
Fleiri í strætó til og frá vinnu eða skóla
Einnig var spurt: „Með hvaða hætti fór barnið þitt/börnin þín í grunnskólann í morgun?“ og: „Með hvaða hætti ferðast þú að jafnaði til vinnu eða skóla á morgnana?“ Það sem helst má lesa úr svörunum er að strætóferðir eru í marktækri sókn.
Um 66% barna gengu í skólann samkvæmt þessari könnun, 22% sem farþegar í einkabíl og 10% í strætó eða skólabíl og 1% á reiðhjóli. Árið 2014 gengu 68% í skólann en árin 2012 og 2013 voru það fleiri en 70%. Ef til vill kemur það spánskt fyrir sjónir að börnum í Miðbænum og Vesturbæ er fremur skutlað í skólann en börnum í öðrum hverfum, en aðeins 50% barna í Mið- og Vesturbæ gengu í skólann. Skýringin gæti verið að mörg þeirra þurfa að fara yfir Hringbrautina í Hagaskóla eða þau koma úr Skerjafirði. Yfir 70% barna í Árbæ, Grafarholti, Breiðholti, Grafarvogi og Kjalarnesi ganga í skólann og 66% barna í Hlíðum, Laugardal og Háaleiti.
Fullorðnir voru spurðir: „Með hvaða hætti ferðast þú að jafnaði til vinnu eða skóla á morgnana?“ 12% gengu, 65% keyrðu,13% fóru með strætó, 5% fóru á bíl sem farþegi og 5% hjóluðu. Árið áður fóru aðeins 8% í strætó, þannig að þar hefur talan helst breyst. Samgönguvenjur Mið- og Vesturbæinga eru vistvænni en í öðrum hverfum því 24% þeirra ganga í vinnuna eða skólann, 21% fer með strætó og 46% með bifreið. Árbæingar og Grafarholtsbúar fara hins vegar yfirleitt í bíl eða 83% íbúa.
Tengill