Ráðhús Reykjavíkur tekur þátt í verkefni Landverndar og Reykjavíkurborgar gegn matarsóun.
Mannlíf
Verkefnið stendur í viku og var byrjað á því að vigta matarleifar eftir hádegismat starfsmanna í mötuneyti Ráðhússins. Þá var haldinn fyrirlestur á vegum Landverndar um matarsóun og efni miðlað til starfsmanna um hvernig draga megi úr matarsóun með betri nýtingu á matarafgöngum.
Gefin eru góð ráð um hvenær matvæli eru útrunnin og hvað síðasti neysludagur þýðir í raun og veru. Rakel Garðarsdóttir, áhugamaður um matarsóun og stofnandi Vakandi hreyfingarinnar, mun halda hugleiðslu fyrir starfsfólk og gefa góð ráð. Verkefninu lýkur svo með því að vigta matarleifar í mötuneytinu að viku liðinni og kanna hvort árangur hefur hlotist af verkefninu.
Ákveðið hefur verið að leggja enn frekari áherslu á matarsóun í Grænum skrefum í starfsemi Reykjavíkurborgar sem vinnustaðir borgarinnar hafa tekið þátt í frá 2011. Reynslan af verkefninu mun nýtast í áframhaldandi vinnu við að draga úr sóun á mat á vinnustöðum borgarinnar.
Forrannsókn Landverndar sem unnin var fyrir styrk frá Reykjavíkurborg sýndi að matvælum fyrir 4,5 milljarða króna er hent árlega af reykvískum heimilum. Samkvæmt mælingum inni á sautján heimilum hendir hver einstaklingur um 48 kg á ári sem gerir um 150 þúsund krónur fyrir fjögurra manna fjölskyldu.
Matarsóun er mikið í umræðunni þessa dagana á Íslandi sem og á heimsvísu. Almennt er talið að um þriðjungi framleiddra matvæla sé sóað. Þessi sóun á sér stað á öllum stigum virðiskeðju matvæla, allt frá ræktun og uppskeru til neytenda. Með því að draga úr þessari sóun má nýta betur fjármagn, auðlindir sem og koma í veg fyrir óþarfa losun gróðurhúsalofttegunda.
Það ættu allir að temja sér betri nýtingu á matvælum og hugsa sig tvisvar um áður en farið er út í búð. Ekki kaupa inn einhvern óþarfa sem dagar uppi í ísskápnum og endar í ruslinu það er matarsóun. Inn á heimasíðunni www.matarsoun.is má finna allskonar fróðleik sem kemur að gagni til þess að sporna gegn matarsóun.