Nýtt tölublað er komið út af ritinu Borgarsýn sem umhverfis- og skipulagssvið gefur út.
Þetta er 15. tölublaðið af Borgarsýn en í því er fjallað um umhverfis- og skipulagsmál í Reykjavík og allar þær fjölmörgu framkvæmdir sem eru í undirbúningi í borginni við sundin.
Vorverkin eru löngu hafin í borginni en vorhreinsun í Reykjavík tekur alla jafna átta til tíu vikur. Hreinsun hjólastíga er í forgangi en annars er unnið eftir forgangslista þvert á borgarlandið. Allar gangstéttir og götur eru sópaðar og að lokum er allt þvegið en þvottur á húsagötum hófst 2. maí sl. Áætluð verklok vorhreinsunar er í fyrstu viku júní.
Vorhreinsun verður rétt lokið þegar grassláttur mun hefjast en í sumar verður slegið þrisvar sinnum í borginni á um 9.500 sláttusvæðum en við þjóðvegina innan borgarinnar er slegið oftar.
Samkvæmt Borgarsýn verður mikið framkvæmt í Reykjavík í sumar en borgin mun á árinu verja um 9,2 milljörðum króna til uppbyggingar og viðhalds á mannvirkjum. Þar af verður malbikað fyrir 710 milljónir króna.
Þá munu Smiðjustígur og Hverfisgata á milli Klapparstígs og Smiðjustígs breyta um svip í sumar en til stendur að endurnýja göturnar.
Fínar greinar eru um vatnsvernd á höfuðborgarsvæðinu, hugmyndasamkeppni um Gufunes, uppbyggingu á Kirkjusandi, Vogabyggð og vegtengingar á milli Úlfarsárdals og Reynisvatnsáss. Einnig er fjallað um umhverfismál, þéttingu byggðar, umhverfisvottun bygginga, flokkun á úrgangi og matarsóun.
Borgarsýn kemur út þrisvar til fjórum sinnum á ári.