Tilraunaverkefni Reykjavíkurborgar um notendastýrða persónulega aðstoð (NPA) hófst sumarið 2013 þegar 14 einstaklingar voru valdir til að taka þátt í tilraunaverkefni. Það miðar að því að þróa nýjar leiðir í þjónustu við fatlað fólk. Notendastýrð persónuleg aðstoð þýðir að einstaklingurinn stýrir sjálfur þjónustunni, tíðni hennar og hverjir inna hana að hendi.
Samráðshópur var fenginn til að kortleggja reynslu fólks af NPA og var það gert með fundum og samráði.
Í ljós kom að mikil ánægja hefur verið með NPA-verkefnið af hálfu þeirra 14 einstaklinga sem tóku þátt í tilraunaverkefninu og þeir upplifa mikla breytingar í þjónustu. Ekki ráða þó allir notendur við eins mikla verkstjórn og NPA -þjónusta gerir ráð fyrir og því þarf að kanna betur ólíkar þarfir þeirra.
Allir notendur töldu þá NPA-þjónustuna svara betur þörfum sínum og margir töldu að hún hefði gjörbreytt lífi þeirra. Mikill munur var á því hversu mikil þátttaka notenda var í daglegri stjórn þjónustunnar. Meiri verkstjórn fylgdi meiri ánægja.
Framkvæmd NPA hjá langveikum notendum reyndist flóknari en hjá fötluðu fólki. Helsta gagnrýni á NPA var hversu flókin umsýsla er með samningum, auk þess sem einstaklingar upplifðu lítið eftirlit frá þjónustumiðstöðvum nema hvað varðaði fjármagn. Þá gerðu notendur athugasemd við að ekki var viðhaft meira samráð við þá, til dæmis um reglur og verklag. Þeir voru hins vegar sáttir við að hafa fengið að koma skoðunum sínum á framfæri. Þátttakendur upplifðu kvíða og áhyggjur varðandi framhald þjónustunnar eftir að tilraunaverkefninu lýkur.
Um framhald þjónustunnar er þess beðið að Alþingi setji lög um NPA sem tryggi rétt fólks til þjónustunnar og að jafnframt verði gert fjárhagslegt samkomulag milli ríkis og sveitarfélaga um fjármögnun hennar.
Fylgigögn í hjálögðu viðhengi;
Minnisblað lagt fyrir velferðarráð um NPA
Erindisbréf samráðshóps vegna tilraunaverkefnis um NPA.
Áfangaskýrsla samráðshóps vegna tilraunaverkefnis um notendastýrða persónulega aðstoð.