Menningarstefna Reykjavíkurborgar undir yfirskriftinni „Menning er mannréttindi“ var samþykkt af borgarstjórn 20. maí. Það er nýmæli að gerð hefur verið aðgerðaráætlun sem er fylgiskjal stefnunnar og verður hún uppfærð árlega í samræmi við samþykkta stefnumörkun og fjárhagsáætlun borgarinnar, en stefnan sjálf gildir frá árinu 2014-2020. Fyrsta menningarstefna Reykjavíkurborgar var samþykkt árið 2001 og hefur hún nú verið endurskoðuð í fjórða sinn.
Leiðarljós menningarstefnunnar er þríþætt. Í fyrsta lagi að Reykjavík gegnir menningarlegu forystuhlutverki. Í öðru lagi að sjálfsmynd borgarinnar byggir á skapandi hugsun, frumkvæði og menningararfi í samspili við alþjóðlegar stefnur og strauma. Og í þriðja lagi að menningarlífið einkennist af metnaði, fjölbreytni, samvinnu og virkri þátttöku íbúa og gesta.
Hin 18 markmið stefnunnar tengjast málaflokkum undir kaflaheitunum: Auðlind; Börn og menningaruppeldi; Menningarstofnanir Reykjavíkurborgar; Listir; Aðgengi og þátttaka; Umhverfi og saga; Alþjóðleg menningarborg; Þáttur menningar í stjórnkerfi Reykjavíkurborgar og Menning í stafrænum miðlum, en sá þáttur er nýmæli í stefnumótun borgarinnar.
Við endurskoðun menningarstefnunnar var haft gott samráð við Bandalag íslenskra listamanna og aðra helstu samstarfsaðila borgarinnar í menningarmálum auk þess sem litið var til annarrar stefnumótunar svo sem nýrrar menningarstefnu ríkisins og menningarstefnu erlendra borga.
Yfirskrift menningarstefnunnar að þessu sinni, Menning er mannréttindi, er tilvísun til menningarlegra réttinda í allnokkrum mannréttindasáttmálum en einkum þó alþjóðasamningi Sameinuðu þjóðanna um efnahagsleg, félagsleg og menningarleg réttindi. Þar stendur meðal annars: „Þar sem menning er ein helsta driffjöður þróunar verður að telja menningarlega þætti þróunar jafngilda hinum efnahagslegu sem einstaklingar og þjóðir hafi grundvallarrétt til að taka þátt í og njóta.“ Yfirskriftin endurspeglar jafnframt skilning á því að menning og listir koma kjarna mannlegrar tilveru við – að menning og listir skilgreina hver við erum sem einstaklingar og sem samfélag.
Starfshóp um endurskoðun menningarstefnu skipuðu Einar Örn Benediktsson, formaður menningar- og ferðamálaráðs, Ósk Vilhjálmsdóttir, Davíð Stefánsson, Svanhildur Konráðsdóttir sviðsstjóri menningar- og ferðamálasviðs og Signý Pálsdóttir skrifstofustjóri menningarmála. Verkefnastjórn við lokaútgáfu var í höndum Sólrúnar Sumarliðadóttur sérfræðings.