Rithöfundurinn Einar Már Guðmundsson tekur þriðjudaginn 13. ágúst á móti gestum á hlaðinu við Viðeyjarstofu og spjallar um eyna út frá skáldverkum sínum.
Í þeim skáldsögum Einars sem tengjast Vogahverfinu er Viðey hluti af goðfræði hverfisins við Sundin og eyjan kemur einnig fyrir í nokkrum ljóða hans. Einar mun ræða um Viðey í þessu skáldlega samhengi og hvernig hún hefur leitað á huga hans, ekki bara sem raunveruleiki heldur líka sem skáldskapur og ævintýri.
Spjallið hefst kl. 19.30 og siglt verður til Viðeyjar frá Skarfabakka kl. 18.15 og 19.15. Kaffihúsið í Viðeyjarstofu verður opið og upplagt að njóta kvöldverðar í Viðey áður en leiðsögn byrjar eða að fá sér hressingu að spjalli loknu áður en haldið er heim á leið, en síðasta ferjan siglir frá Viðey um kl. 22.00.
Ef illa viðrar færum við okkur inn í Viðeyjarstofu enda er alltaf gott veður þar.
Gjald í ferjuna fram og til baka er kr. 1100,- fyrir fullorðna og kr. 550,- fyrir börn 7 - 15 ára í fylgd fullorðinna. Frítt fyrir 6 ára og yngri. Leiðsögnin er ókeypis og öllum opin.
Við minnum á að handhafar Menningarkorts Reykjavíkur fá 10% afslátt í Viðeyjarferjuna og í Viðeyjarstofu.