Upplýsingasetur fyrir innflytjendur. Opinn fundur um niðurstöður Fjölmenningarþings verður haldinn í Hafnarhúsinu við Tryggvagötu í dag fimmtudaginn 30. maí klukkan 17:30. Yfirskrift fundarins er Hvað segja innflytjendur?
Fjölmenningarþing var haldið í Borgarleikhúsinu í nóvember í fyrra. Þingið var á vegum mannréttindaskrifstofu Reykjavíkurborgar og var tilgangur þess að fá fram skoðanir innflytjenda á þeirri þjónustu sem stendur þeim til boða og leita úrræða til að auðvelda gagnkvæma aðlögun þeirra og íslensks samfélags. Þátttakendum var skipt niður á 14 borð eftir tungumálum og voru allt að 10 þátttakendur á hverju borði og voru niðurstöður teknar saman og eru nú birtar í skýrslu um þingið.
Helstu niðurstöður eru:
Þinggestir töldu sig helst þurfa upplýsingar á sínu móðurmáli um margvísleg mál, s.s. varðandi dvalarleyfi, atvinnumöguleika, réttindi, opinberar stofnanir, heilbrigðisþjónustu, menntun, málefni foreldra, tryggingar, húsnæðismál, bankaupplýsingar, skattaskýrslu og starfsemi ýmissa samtaka. Einnig var minnst á nauðsyn þess að vita hvert megi leita eftir upplýsingum og við hvern sé best að tala.
Almennt séð töldu flestir að það væri mikilvægt að innflytjendur tæku virkan þátt í stjórnmálalegri umræðu í íslensku samfélagi. „Við getum ekki tekið þátt vegna þess að við erum ekki með í umræðunni og erum ekki tekin alvarlega“, sagði einn þinggesta. Þeir bentu enn fremur á að tungumálaerfiðleikar hindruðu þátttöku þeirra og töldu að þeir gætu sjálfir staðið sig betur í þeim efnum.
Þátttakendur í öllum hópunum töldu að fjölmiðlar fjölluðu á neikvæðan hátt um innflytjendur og gæti það alið á fjandskap og ótta gagnvart innflytjendum og skapað slæma ímynd af þessum þjóðfélagshóp. Rangar upplýsingar í fréttum leiði til þess að innflytjendur væru settir undir einn hatt og oft misskildir. Innflytjendur vilja hafa meiri áhrif með því að skrifa greinar í fjölmiðla og fá stuðning til að koma rödd sinni á framfæri.
Það var almenn skoðun meðal innflytjenda að upplýsingar ættu að vera aðgengilegar á ýmsum stöðum, t.d. á vefsíðum og á fésbókinni, í gegnum ráðgjöf og bæklinga o.fl. Það þyrfti að koma meira til móts við ólíkar þarfir fólks og því nauðsynlegt að þýða upplýsingaefni á hin ýmsu tungumál. Næstum allir umræðuhóparnir kvörtuðu undan því að fá oftar en ekki rangar eða misvísandi upplýsingar frá hinum ýmsum stöðum borgarinnar. Þeir töldu þar af leiðandi mikilvægt að hafa upplýsingasetur fyrir innflytjendur sem myndi þjóna því hlutverki að vera allsherjar upplýsingaveita á ólíkum tungumálum jafnt fyrir innflytjendur sem og stofnanir.