Loftslagsborgarfundur með þátttakendum
Þátttakendur í Loftslagsborgarsamningi Reykjavíkurborgar hittust á fundi í Ráðhúsinu fyrr í þessum mánuði. Þetta var fjórði fundurinn með þátttakendum frá aðalfundinum í október. Hver og einn fundur er með ákveðið þema en á þessum fundi voru málefni ferðaþjónustunnar í öndvegi auk þess sem breytt Græn skref í starfsemi Reykjavíkurborgar voru kynnt.
Áður hafa verið þemafundir um samgöngur, úrgangsmál og nýsköpun sem allir voru fræðandi og vel sóttir. Þátttakendur í loftslagsborgarsamningum geta því notið góðs af því að fá að fylgjast með því nýjasta sem er að gerast í hverjum geira fyrir sig og mynda tengslanet sem getur nýst sem nesti í loftslagsleiðangrinum.
Þessi fundur hófst á því að Hrönn Hrafnsdóttir, deildarstjóri loftslagsmála hjá Reykjavíkurborg, fór yfir stöðuna á samningum almennt en alls hafa 106 borgir af 112 þátttökuborgum klárað samninginn og fengið viðurkenningu á honum. Fyrsti loftslagsborgarsamningur Reykjavíkur var undirritaður 7. október 2024. Reykjavíkurborg fékk samninginn síðan samþykktan við formlega athöfn á loftslagsráðstefnu í Vilníus í Litáen 7. maí 2025.
Hafdís Hanna Ægisdóttir, forstöðumaður Sjálfbærnistofnunar Háskóla Íslands, var fundarstjóri en fyrstur með erindi var Kristinn Már Hilmarsson, sérfræðingur í sjálfbærni frá Festu, sem var með áhugavert erindi um samöngur, losun og hegðunarbreytingar. Hann fór meðal annars í saumana á losun vegna ferða til og frá vinnu. Þessi þáttur er jafnan ekki stór þáttur í losun fyrirtækja og því er mikilvægt að líta á eflingu virkra ferðamáta ekki aðeins sem loftslagsverkefni heldur leggja áherslu á aðra þætti eins og heilsu og vellíðan starfsfólks, félagslega tengingu og kostnað. Fundargestir tóku síðan þátt í hugarflugi um hvernig hægt sé að breyta ferðavenjum og komu fram með ýmsar hugmyndir.
Myndir
Græn skref og ferðaþjónustan
Hildur Sif Hreinsdóttir sér um Græn skref í starfsemi Reykjavíkurborgar en hún kynnti breytingar á þeim og hvernig Grænu skrefin séu nú betur tengd við loftslagsmarkmið Reykjavíkurborgar og Loftslagsborgarsamninginn. Hún fór yfir hvernig umhverfisstarf sé kjarnastarf en alls ekkert gæluverkefni. Mikilvægt sé að hafa einfaldar leiðbeiningar og skýr skilaboð á þessari vegferð. Hægt er að draga mest úr losun í þremur flokkum; úrgangsmálum, samgöngum og innkaupum og haldið er mælaborð yfir árangur sem þátttakendur geta nálgast.
Þá var komið að ferðaþjónustunni en Margrét Wendt frá Markaðsstofu höfuðborgarsvæðisins fór yfir hvernig hjartað í framtíðarsýninni sé sjálfbærni og að ferðaþjónusta hafi jákvæð áhrif. Hluti af því er stofnun faghóps sjálfbærni að erlendri fyrirmynd þar sem fyrirtæki sem eru leiðandi í sjálfbærni koma saman. Áherslan er á samgöngumál og úrgangsmál. Skoðað er hvar aðgerða er þörf og áætlun mótuð eftir því.
Er hægt að búa til kolefnsbókhald ferðaþjónustu í Reykjavík?
Böðvar Þórisson sérfræðingur hjá Reykjavíkurborg hefur verið að skoða hvernig hægt sé að búa til kolefnisbókhald ferðaþjónustu í Reykjavík. Hann kynnti áhugaverða aðferð til þess sem getur hjálpað til við að meta áhrif ferðaþjónustunnar á þessu sviði en þarna er verið að horfa aðeins á losun innan borgarinnar. Hlutfall ferðamanna í Reykjavík á hverjum tíma er um 15-17% að jafnaði en þáttur ferðmanna í losun Reykjavíkur er í kringum 20% en þeir menga hlutfallslega meira, meðal annars vegna skemmtiferðaskipa.