Áframhaldandi sterk staða Reykjavíkurborgar
Rekstrarniðurstaða A- og B- hluta er jákvæð um 8 milljarða króna en niðurstaðan af rekstri A-hluta var neikvæð um ríflega fimm milljarða. Helsta skýring neikvæðrar niðurstöðu af A-hluta borgarinnar er mikil hækkun lífeyrisskuldbindinga auk þess sem há verðbólga og óvissa á atvinnumarkaði leiðir til hægari vaxtar útsvarsgreiðslna. Rekstur málaflokka og þjónustu var í jafnvægi og í takt við áætlanir.
Ársreikningur Reykjavíkurborgar árið 2025 var lagður fyrir borgarráð í dag 27. apríl og vísað til fyrri umræðu í borgarstjórn á morgun, 28. apríl.
Áframhaldandi sterk staða
Rekstrarniðurstaða A- og B-hluta var jákvæð um 8 milljarða króna, sem var um 2,7 milljörðum krónum lægri niðurstaða en árið 2024. Lakari niðurstöðu miðað við árið 2024 má einkum rekja til gjaldfærslu lífeyrisskuldbindingar sem nam 9,9 milljörðum króna á árinu 2025. Rekstrarniðurstaða fyrir skatta, matsbreytingar og áhrif hlutdeildarfélaga var engu að síður jákvæð um 2,5 milljarða króna. Matsbreyting fjárfestingaeigna Félagsbústaða hafði jákvæð áhrif á niðurstöðu rekstrar og nam 8,3 milljörðum króna.
Í samstæðu borgarinnar gætti einkum áhrifa af rekstrarfalli Norðuráls sem hafði neikvæð áhrif á afkomu tengdra félaga, þar á meðal Orkuveitu Reykjavíkur og Faxaflóahafnir.
Heildareignir A- og B-hluta yfir 1000 milljarðar
Heildareignir A- og B-hluta samkvæmt samanteknum efnahagsreikningi 31. desember 2025 voru yfir eitt þúsund milljarðar króna eða 1.038 milljarðar og heildarskuldir ásamt skuldbindingum námu 560,5 milljörðum króna. Eiginfjárhlutfall A- og B-hluta í árslok var 46,0%. Eigið fé A- og B-hluta hækkaði um 23,5 milljarða milli ára sem má rekja til jákvæðrar rekstarniðurstöðu, endurmats á framleiðslu- og dreifikerfi Orkuveitu Reykjavíkur og hækkunar lóðamats sem skatttekjur reiknast af hjá A-hluta.
Veltufé frá rekstri nam 42,9 milljörðum króna, eða 14,6% í hlutfalli af tekjum. Fjárfestingar (brúttó) námu 64 milljörðum eða 21,8% í hlutfalli af tekjum. Ráðstafað var 6 milljörðum krónum meira til fjárfestinga í samstæðu borgarinnar árið 2025 en árið 2024. Handbært fé nam 30,8 milljörðum í lok árs.
Rekstur málaflokka í jafnvægi en ytri áskoranir hafa neikvæð áhrif
Rekstrarniðurstaða A-hluta var neikvæð um 5,3 milljarða króna á árinu 2025 sem var 5,7 milljörðum undir áætlaðri niðurstöðu. Gjaldfærsla lífeyrisskuldbindingar vegna R-deildar Brúar Lífeyrissjóðs nam 9,9 milljörðum króna á árinu og vó þyngst í fráviki rekstrar. Grunnreksturinn, það er að segja rekstrarniðurstaða fyrir fjármagnsliði og afskriftir (EBITDA) var jákvæð um 7,3 milljarða króna. Rekstur málaflokka A-hluta var í jafnvægi þegar horft er til fjárhagsáætlana fagsviða fyrir árið.
Veltufé frá rekstri nam 14,3 milljörðum króna og var 6,9% í hlutfalli af tekjum og hækkaði um 0,6%-stig á milli ára. Skuldaviðmið A-hluta í árslok 2025 var 80%. Kennitölur fjármálastefnu sýna allar jákvæða þróun ef undan eru skilin áhrif lífeyrisskuldbindinga á jafnvægi í rekstri.
Vísitala lífeyrisskuldbindinga hækkaði um 11,7% á árinu
Mikla hækkun lífeyrisskuldbindinga má einkum rekja til þess að vísitala lífeyrisskuldbindinga sem mælir launaþróun á opinberum markaði, og skylt er að nýta við tryggingafræðilegt mat áfallinna skuldbindinga, hækkaði um 11,7% á árinu 2025. Á móti kemur að eignir sjóðsins samkvæmt tryggingafræðilegu mati standa í stað á milli ára öfugt við árið 2024, þar sem raunávöxtun þeirra er undir 3,5% viðmiði samkvæmt reglugerð um skyldutryggingu lífeyrisréttinda.
450 milljónir króna vegna samnings við ríkið frá 2004
Í rekstrarreikningi ársins eru færðar til gjalda aukalega 450 milljónir króna vegna samnings Reykjavíkurborgar og íslenska ríkisins frá árinu 2004 um þátttöku í kostnaði við nauðsynlega uppbyggingu bílastæða og bílastæðahúsa innan lóða LHS. Ýmis mál vegna uppbyggingar á Landsspítalareit eru ófrágengin á milli NLSH ohf. og borgarinnar sem gætu komið til tekna á móti gjaldfærslunni.
Uppbyggingasamningar sem gerðir voru 2025 koma til tekna síðar
Tekjur A-hluta námu 206,6 milljörðum króna og hækkuðu um 12,1 milljarð eða 6,2%. Staðgreiðsla útsvars hækkaði um 9,3 milljarða króna borið saman við árið 2024 eða um 7%. Tekjur af sölu byggingarréttar sem færast á greiðslugrunni námu 3,4 milljörðum króna á árinu. Fjölmargir uppbyggingasamningar voru gerðir á árinu 2025 sem hafa ekki komið til tekna.
Laun og annar rekstrarkostnaður án lífeyrisskuldbindinga nam 189,5 milljörðum króna og hækkaði um 7% á milli ára. Launaútgjöld hækkuðu um 8,4 milljarða króna eða um 8,1% en nýir kjarasamningar hafa hér nokkur áhrif.
Fjárfest í skólum og öðrum innviðum
Heildareignir A-hluta samkvæmt efnahagsreikningi 31. desember 2025 námu samtals 308,7 milljörðum króna og heildarskuldir ásamt skuldbindingum voru 221,7 milljarðar króna. Eigið fé nam 87 milljörðum. Eiginfjárhlutfall nam 28%.
Fjárfestingar ársins beindust að uppbyggingu, viðhaldi og endurnýjun skóla og leikskóla og innviðum gatna. Lántaka Reykjavíkurborgar lækkaði á milli ára og það sama gildir um afborganir af langtímalánum.
--
Rekstur Reykjavíkurborgar skiptist í A-hluta og B-hluta. Til A-hluta telst starfsemi sem að hluta eða öllu leyti er fjármögnuð með skatttekjum. Um er að ræða Aðalsjóð, sem heldur utan um rekstur fagsviða og Eignasjóð. Til B-hluta teljast fjárhagslega sjálfstæð fyrirtæki sem að hálfu eða meirihluta eru í eigu Reykjavíkurborgar, en rekstur þeirra er að stofni til fjármagnaður með þjónustutekjum.