Barnabókaverðlaun Guðrúnar Helgadóttur
Barnabókaverðlaun Guðrúnar Helgadóttur voru stofnuð árið 2018 til heiðurs Guðrúnu Helgadóttur rithöfundi. Verðlaunin eru veitt árlega fyrir óprentað handrit að barna- eða ungmennabók og styðja þannig við nýsköpun í greininni. Dómnefnd verðlaunanna er skipuð þremur einstaklingum sem les öll innsend handrit og velur verðlaunahafa. Skrifstofa Reykjavíkur bókmenntaborgar UNESCO hefur umsjón með verðlaununum.
Á sjöunda tuga handrita bárust í ár. Dómnefnd hefur nú lokið störfum og hefur verið haft samband við höfund þess handrits sem hlýtur verðlaunin í ár. Öllum handritum sem bárust verður eytt, í samræmi við verklag og persónuverndarsjónarmið.
Verðlaunin verða veitt í Höfða þann 3. september næstkomandi og verður þá gert opinbert hver hlýtur verðlaunin árið 2025.
Hver eru verðlaunin?
Verðlaunahafi hlýtur verðlaunafé ásamt viðurkenningunni sjálfri. Verðlaunaféð er greitt af Reykjavíkurborg og eru ein verðlaun veitt árlega í kring um afmælisdag Guðrúnar Helgadóttur 7. september. Árið 2025 verður upphæð verðlaunanna 1.000.000 krónur.
Hvernig tek ég þátt?
Handritum skal skilað rafrænt á .pdf-formi hér á síðunni og verður það hægt til 1. maí 2025. Handritin eru geymd á læstu svæði og eytt tveimur vikum eftir að dómnefnd hefur komist að niðurstöðu. Nafnleynd höfunda verður eftir sem áður tryggð í þessu ferli, þar sem innsendingarnar verða unnar í aðgangsstýrðu kerfi sem tryggir að dómnefnd fær handritin einungis merkt dulnefnum, rétt eins og áður.
Hver á útgáfuréttinn?
Útgáfuréttur verðlaunahandrits er í höndum höfundar eða þess forlags sem hann ákveður að starfa með.
Hvernig er dómnefnd skipuð?
Dómnefnd verðlaunanna er skipuð af menningar-, íþrótta- og tómstundaráði til eins árs í senn. Hana skipa þrír fulltrúar, þar af einn samkvæmt tilnefningu Rithöfundasambands Íslands, annar samkvæmt tilskipun IBBY á Íslandi og þriðji samkvæmt skipun Reykjavíkur bókmenntaborgar UNESCO, sem jafnframt skipar formann.
Sé dómnefnd á einu máli um að ekkert þeirra verka sem borist hafa fullnægi þeim kröfum sem hún telur að gera verði til verðlaunaverka, má fella verðlaunaafhendingu niður það ár.