Reykjavíkurborg er annar mest spennandi fjárfestingarkostur Norðurlandanna að mati fDi Intelligence tímaritsins sem gefið er út af stórblaðinu Financial Times. Reykjavíkurborg og Íslandsstofa skoða nú að hafa samstarf um þátttöku á alþjóðlegri fasteignaþróunarráðstefnu til að kynna tækifærin í höfuðborginni.
Reykjavíkurborg var nú í mars í öðru sæti á lista yfir norður evrópskar borgir framtíðarinnar í sérriti fDi Intelligence: „European Cities and Regions of the Future 2014/2015“. fDi Intelligence er gefið út af Financial Times og sérhæfir sig í umfjöllun um beina erlenda fjárfestingu. Einungis Helsinki var fyrir ofan Reykjavík en bæði Stokkhólmur og Kaupmannahöfn lentu í neðri sætum í flokknum „Norður evrópskar borgir að Bretlandi og Írlandi undanskildum“.
European Cities and Regions of the Future er gefið út á tveggja ára fresti og varpar ljósi á borgir og svæði með mikil tækifæri til fjárfestinga á komandi árum. Listarnir eru unnir af sérfræðingum tímaritsins og byggja á sjálfstæðri gagnaöflun þar sem meðal annars er skoðuð laun, verg landsframleiðsla, innviðir, menntunarstig, atvinnusköpun og verðbólga á 468 stöðum, bæði borgum og héruðum.
Það var skrifstofa eigna og atvinnuþróunar hjá Reykjavíkurborg sem hafði umsjón með þátttöku borgarinnar í greiningu fDi Intelligence. Skrifstofan hefur það hlutverk að stuðla að uppbyggingu í Reykjavík með samhæfingu skipulags, fjárfestinga og framkvæmda. Óli Örn Eiríksson, deildarstjóri atvinnuþróunar á skrifstofunni segir árangurinn eftirtektarverðan og sýni sterkar grunnstoðir hagkerfis Reykjavíkurborgar í alþjóðlegum samanburði.
Stærsta fasteignaþróunarráðstefna í heimi
Hrólfur Jónsson skrifstofustjóri Skrifstofu eigna og atvinnuþróunar hjá Reykjavíkurborg tók á móti sérstakri viðurkenningu Fdi Magazine á MIPIM fasteignaþróunarráðstefnunni í Cannes í síðustu viku. Hrólfur leiddi þar íslenska sendinefnd sem kannaði möguleika þess að Reykjavík myndi taka þátt í MIPIM, en ráðstefnan er stærsta ráðstefna sinnar tegundar í heiminum. Á MIPIM kynna borgir, lönd og fylki fjölda þróunarverkefna á sínu svæði með það að markmiði að fá erlenda fjárfesta til liðs við verkefnin svo þau geta orðið að veruleika auk þess sem verktakar, verkfræðistofur, arkitektar, fjármálastofnanir o.fl. líta á MIPIM sem eina skilvirkustu leiðina til að kynna starfsemi sína í tengslum við erlenda verkefnaöflun.
Yfir 20 þúsund gestir frá um 80 löndum sækja ráðstefnuna, 4.303 fjárfestar og 1.650 stjórnendur fyrirtækja.
Skrifstofa eigna og atvinnuþróunar sér um markaðssetningu og þróun lands í samræmi við atvinnustefnu borgarinnar og aðalskipulag. Hún vinnur í samráði og samvinnu við fagsvið og fyrirtæki borgarinnar, önnur sveitarfélög, hið opinbera sem og einkaaðila.