Sjúk ást, hvað getum við gert?

föstudagur, 6. apríl 2018

Ungmennaráð Breiðholts stóð fyrir líflegu málþingi í dag um samskipti í ástarsamböndum ungs fólks.  

  • Fylgst með erindi um sjúk ástarsambönd.
    Fylgst af áhuga með erindi um sjúk ástarsambönd.
  • Flestir gátu tengt við umfjöllunarefnið.
    Rætt saman um heilbrigð og óheilbrigð samskipti.
  • Steinunn Gyðu og Guðjónsdóttir frá Stígamótum heldur erindi.
    Steinunn Gyðu- og Guðjónsdóttir frá Stígamótum hélt erindi.
  • Hvenær er afbrýðissemi réttlætanleg?
    Hvenær er afbrýðissemi réttlætanleg?
  • Hvað getum við gert?
    Hvað getum við gert?

Málþingið var haldið í Austurbergi og áttu flestir grunnskólar borgarinnar sína fulltrúa þar. Umræðuefnið var mikilvægt; munurinn á heilbrigðum og óheilbrigðum samböndum, kynferðisleg áreitni og samskipti á netinu.  

Dagskráin hófst klukkan ellfu með erindi Steinunnar Gyðu- og Guðjónsdóttir, verkefnastýru hjá Stígamótum, og fjallaði hún um sjúk samskipti ungs fólks í nánum samböndum sem byggðust á afbrýðissemi, þvingunum og jafnvel ofbeldi. Þá fjallaði Dagbjört Ásbjörnsdóttir verkefnastjóri á skóla- og frístundasviði um kynferðislega áreitni og að lokum fjölluðu þau Kári og Andrea, sem vinna með ungmennum í félagsmiðstöðvastarfi, um óheilbrigð samskipti á netinu.

Vel á annað hundrað unglingar sóttu málþingið og urðu líflegar umræður á milli erindanna og augljóst að efnið brann á mörgum fundargestum. Málþingið fellur inn í umræður sem skapast hafa í samfélaginu í kjölfar me-too byltingar og sýningar á myndinni Mannasiðir um páskanna og því auðvelt að tengja umfjöllunarefnið við það sem ungir sem aldnir þekkja í umfjöllun fjölmiðla undanfarna mánuði. 

Ungmennaráð Breiðholts skipulagði málþingið og er það í anda annarra málþinga á þeirra vegum fyrir ungmenni í borginni þar sem lögð er áhersla á samtal milli ungs fólks um mikilvæg málefni sem á þeim brenna. Fundarstjóri var Elínborg Una Einarsdóttir sem situr í ungmennaráði Breiðholts.