Reykjavík Climathon 2018 verður haldið í annað sinn í Reykjavík 26. október nk. Loftslagsmaraþon er sólarhringsáskorun um nýsköpun í loftslagsmálum sem haldin er samtímis í 110 borgum í öllum heimsálfum.
Viðburðurinn verður haldinn í höfuðstöðvum Matís við Vínlandsleið 12 og hefst klukkan 09:00 og stendur fram á laugardagsmorgun.
Climathon snýst ekki aðeins um loftslagsbreytingar heldur einnig um innblástur í gegnum nýsköpun. Í gegnum hakkaþon fá þátttakendur tækifæri til að upplifa hvernig hugmynd verður að veruleika, hvernig tengslanet myndast og þeir fá æfingu í því að kynna hugmyndir fyrir dómnefnd. Hagsmunaaðilar geta tekið þátt og séð hvernig þeir eiga samleið með Reykjavík og verið um leið hluti af alþjóðlegri hreyfingu.
Hér á Íslandi er viðburðurinn skipulagður af Reykjavíkurborg og Matís ohf. í samvinnu við EIT Climate KIC evrópskri þekkingarmiðstöð sem vinnur að kolefnislausu hagkerfi.
Áskorun Climathon 2018 skiptist í þrjá hluta:
- Hvernig er hægt að gera ferðaþjónustu í Reykjavík sjálfbærari og vistvænni?
- Hvernig er hægt að gera meðferð og nýtingu matvæla í Reykjavík sjálfbærari?
- Hvernig er hægt að efla hringrásarhugsun og hringrásarhagkerfi í samfélagi okkar?
Í því felst t.d. að endurvinna og endurnýta hluti frekar en að farga þeim.
Þátttakendum verður skipað í teymi eftir áhugasviðum þeirra og verða sérfræðingar
til aðstoðar. Það verður rafmagnað andrúmsloft, vinnustofur, hópumræður og óvæntar uppákomur. Í lokin þurfa þátttakendur að kynna hugmyndir sínar að lausnum í loftslagsmálum fyrir dómnefnd og veitt verða verðlaun fyrir bestu hugmyndina.
Boðið verður upp á hollan og næringarríkan mat.
Viðburðurinn er opinn öllum sem láta sig loftslagsmál varða. Skráningu lýkur 25. október.