Nýr íbúðakjarni í Kambavaði í Norðlingaholti var formlega afhentur velferðarsviði í dag en kjarninn er sérhannaður fyrir einstaklinga með þroskahömlun og skyldar raskanir.
Í Kambavaði eru sex íbúðir, sérhannaðar að þörfum íbúa. Þjónustan er einstaklingsmiðuð og sveigjanleg með það að markmiði að styðja íbúa til þess að eiga sjálfstætt og innihaldsríkt líf á sínum eigin forsendum til samræmis við stefnu Reykjavíkurborgar í þjónustu við fatlað fólk á heimilum sínum. Íbúðirnar eru rúmgóðar, með sérpalli og góðum sameiginlegum garði.
Rekstur íbúðakjarnans er samstarfsverkefni Félagsbústaða og velferðarsviðs Reykjavíkurborgar þar sem Félagsbústaðir sjá um fasteignina en velferðarsvið um þjónustu við íbúana.
Starfsmenn í Kambavaði verða um tuttugu en starfsemi og þjónusta hússins er mönnuð allan sólarhringinn alla daga ársins.
100 íbúðir fyrir fatlað fólk fyrir árslok 2019
Félagsbústaðir sáu um byggingu íbúðakjarnans en verkfræðingar, arkitektar og sérfræðingar velferðarsviðs í málefnum fatlaðs fólks unnu saman að hönnuninni með þarfir íbúanna í huga. Arkitekt og teymisstjóri verkefnisins er Gunnar Bogi Borgarsson. Flotgólf verktakar byggðu íbúðakjarnann en framkvæmdir hófust í febrúar árið 2017. Það hefur því einungis tekið tæpa 14 mánuði að byggja hann.
Með áframhaldandi samstarfi Félagsbústaða og velferðarsviðs verður fljótlega opnaður fullbúinn íbúðakjarni við Austurbrún og síðar í sumar í Einholti. Í undirbúningi er uppbygging á þremur nýjum íbúðakjörnum sem verða við Árland og Stjörnugróf í Fossvogi og við Rökkvatjörn í Grafarholti. Undirbúningur þessara íbúðakjarna er mis langt á veg kominn en gert er ráð fyrir að framkvæmdir við þá geti hafist með haustinu. Stefnt er að því að búið verði að byggja a.m.k. hundrað íbúðir sérstaklega fyrir fatlað fólk fyrir árslok 2019.